Նախքան Ալիևի հետ «խաղաղության պայմանագիր» ստորագրելը, Նիկոլ Փաշինյանի կառավարությունը փորձում է հող նախապատրաստել, որպեսզի ամեն ինչ ընթանա ըստ պլանի։ Ռուսաստանը պետք է մաքրվի 2020-2023 թվականներին Արցախում տեղի ունեցած իրադարձությունների պատասխանատվությունից, որպեսզի դառնա «խաղաղության խաչմերուկի» և հայ-ադրբեջանական պայմանագրի «երաշխավորը»։
Նիկոլ Փաշինյանն անձամբ է մաքրում ռուս զինվորի «սապոգը», որ հիմա էլ, չնայած Արցախի հայաթափմանը, քայլում է արցախյան հողի վրա և պաշտպանում այն հայերից։ Այս մասին հայտարարել է անձամբ ՌԴ պաշտպանության նախարար Սերգեյ Կուժուգեթ-օղլու Շոյգուն։ «Ռուսական զորքերի խմբավորումները շարունակում են մնալ Սիրիայում և Ղարաբաղում խաղաղության պահպանման հիմնական երաշխավորը», — ասել է Շոյգուն՝ Ռուսաստանի պաշտպանության նախարարության կոլեգիայի ընդլայնված նիստում։
Ղարաբաղում խաղաղությունն առանց հայերի խաղաղություն է, ինչպես կարծում է Շոյգուն։ Եվ սրա հետ համաձայն է Նիկոլ Փաշինյանը։
«Ռուսական կողմը բազմիցս հայտարարել է, որ Ղարաբաղը համարում է Ադրբեջանի կազմում, մասնավորապես, ՌԴ նախագահը նման հայտարարություն է արել 2020 թվականի նոյեմբերին և դեկտեմբերին։ Այս հայտարարությունների մասին ես տեղեկացա մամուլից։ Իմ կարծիքով, դրանք հակասում էին նոյեմբերի 9-ի եռակողմ հայտարարությանը»,- վերջին հարցազրույցում ասել է Նիկոլ Փաշինյանը։
Փաշինյանը ոչ թե ասում է, որ Պուտինի հայտարարությունը ճիշտ չէ, այլ պարզապես հաստատում է, որ դա Պուտինի դիրքորոշումն է, և նա միայն կրկնել է դա 2022 թվականի նոյեմբերին։ Նման մանիպուլյացիա է պետք, որպեսզի հայաստանյան ռուսամետ ընդդիմությունը չհամարձակվի դատապարտել Փաշինյանի հայտարարությունները։ «Եթե ընդդիմությունը դեմ է Արցախը Ադրբեջանի կազմում ճանաչելուն, նշանակում է՝ դա Պուտինի դեմ է»,- ասում է Փաշինյանը։
Ընդդիմությունն այս հարցում չի վիճում ո՛չ Փաշինյանի, ո՛չ Պուտինի հետ։
«Ռուսաստանի ռազմաքաղաքական և դիվանագիտական ղեկավարության համար շատ հարցեր կան, բայց դրանք լուծվում են երկխոսության միջոցով»,- ասել է «Հայաստան» խմբակցության պատգամավոր Գեղամ Մանուկյանը։ Նա չի մանրամասնել՝ հատկապես ի՞նչ հարցեր ունի Պուտինին և արդյոք դրա մեջ մտնո՞ւմ է Արցախի պատկանելության ճանաչումը։
Իր հերթին իշխող կուսակցության պատգամավորները վստահեցնում են, որ «Երևանը կբարձրացնի հայ-ռուսական հարաբերությունների մակարդակը բոլոր ոլորտներում»։ Այս մասին ասել է Քաղաքացիական պայմանագիր խմբակցության պատգամավոր Արմեն Խաչատրյանը։ Նա հավելել է, որ Հայաստանն ու Ռուսաստանի Դաշնությունը կապված են շատ «անոթներով», ինչպես նաև տնտեսական և այլ կապերով։
«Ռուսաստանը, ունենալով մի շարք անվտանգության պարտավորություններ Հայաստանի հանդեպ, չկարողացավ կատարել իր պարտավորությունները, պարզապես՝ չկարողացավ»,- ասել է նա։
Փաստորեն, ՔՊ-ն կարծում է, որ Ռուսաստանը ցանկանում է, բայց «չի կարողանում» կատարել իր պարտավորությունները։ Եվ ընդդիմությունը սրա հետ էլ չի վիճում։
Բաքվում ևս ասում են, որ ապագա «խաղաղության պայմանագրի» երաշխավորը կարող են լինել կա՛մ Թուրքիան, կա՛մ Ռուսաստանը։
Նաիրա Հայրումյան