Վարչապետի ուղղությամբ անձրևանոց նետելու գործով ոչ մեղադրյալ կա, ոչ էլ տուժող է ճանաչվել

Վայոց Ձորի մարզի Եղեգնաձոր համայնքի Մալիշկա բնակավայրում վարչապետ Նիկոլ Փաշինյանի ուղղությամբ անձրևանոց նետելու դեպքի առթիվ հարուցված քրեական վարույթի շրջանակներում ոչ մեղադրյալ կա, և ոչ էլ տուժող է ճանաչվել։ Այդ մասին Forrights.am-ին տեղեկացրեց ՀՀ քննչական կոմիտեի նախագահի մամուլի խոսնակ Գոռ Աբրահամյանը։

«Հարուցված վարույթի շրջանակներում ոչ մեադրյալ կա, և ոչ էլ տուժող», -ասաց Քննչական կոմիտեի ներկայացուցիչը։

Ավելի վաղ Քննչական կոմիտեն հաղորդել էր, որ  47-ամյա մի կին չենթարկվելով ոստիկանության ծառայողների կողմից «բազմիցս ներկայացված օրինական պահանջներին և անտեսելով վերջիններիս հորդորները, Մալիշկա բնակավայրի առանձնատներից մեկի բակում, ՀՀ վարչապետի օրինական ծառայողական գործունեությանը միջամտելու նպատակով, փորձել է Նիկոլ Փաշինյանի նկատմամբ բռնություն գործադրել, այն է՝ իր մոտ գտնվող անձրևանոցը դիտավորությամբ նետել է ՀՀ վարչապետի ուղղությամբ»։

Նաև հաղորդվել էր, որ «հետաքննության մարմնի կողմից անմիջականորեն ծագած հիմնավոր կասկածի առկայության հիմքով նշված անձը ձերբակալվել է և ներկայացվել վարույթն իրականացնող մարմնին»:

Այժմ 47-ամյա կինն ազատության մեջ է։ Մալիշկա բնակավայրի ղեկավարը ասել է, որ կինը արցախյան պատերազմի հետևանքով Արցախի Բերձորից տեղահանված է ու այժմ վարձով ապրում է Մալիշկայում։

Դեպքի առթիվ քրեական վարույթ է նախատեսվել ՀՀ Քրեական օրենսգրքի 44-452-րդ հոդվածի 3-րդ մասի հատկանիշներով՝ «Պաշտոնատար անձի օրինական ծառայողական կամ քաղաքական գործունեությանը միջամտելու նպատակով պաշտոնատար անձի նկատմամբ բռնություն գործադրելու փորձ»։

Հարցին, այդուհանդերձ, հնարավո՞ր է՝ քրեական գործը կարճվի, Աբրահամյանը արձագանքեց․ «Սկսվել է նախաքննություն, որի շրջանակներում պարզվում են դեպքի հանգամանքները»։