Հունիսի 24-ին «Liver» արվեստի մենեջմենթի ընկերության ջանքերով Հայ բարեգործական ընդհանուր միությունում բացվեց 44-օրյա պատերազմում զոհված Արամ Պողոսյանի նկարչական աշխատանքների ցուցահանդեսը:
Արամն ուսանել է «Հակոբ Կոջոյան» կրթահամալիրում, հետո`Հայաստանի գեղարվեստի պետական ակադեմիայում, գրաֆիկ-դիզայներ էր, նպատակ ուներ ուսումը շարունակել Իտալիայում: 21 տարեկանում զորակոչվելով բանակ` Արամը ծառայել է նախ Արմավիրի զորամասում, այնուհետեւ`Կուբաթլիում:
Մայրը` Կարինե Հարությունյանը, պատմում է, որ թեեւ արվեստագետներն ազատ կյանքի են սովոր, սահմանափակումներ չեն հանդուրժում, սակայն Արամը երբեք չի բողոքել բանակային ծառայությունից:
Արամի մարտական ընկերը` Սեյրան Սողոյանը, վիրավորվել է, մի կերպ է հաջողվել փրկել նրա կյանքը․
«Արամին վերջին անգամ տեսել եմ այն օրը, երբ ես վիրավորվել եմ, ինքն էլ իմ գրկում է զոհվել: Ես ուզում եմ, որ Արամի մասին չխոսեն անցյալ ժամանակով, իր նկարները ցուցադրվեն, ինքը միշտ հիշվի»,- ասաց Սեյրանը:
Արամի զոհվելուց հետո Գեղարվեստի ակադեմիայից ոչ ոք նրա ընտանիք չի այցելել, չի հետաքրքրվել նրա հարազատներով:
«Ամիսներ անց ես գնացի Գեղարվեստի ակադեմիա, վերցրեցի տղայիս նկարները, բերեցի տուն, չթողեցի, որ որեւէ նկար մնա այնտեղ: Եթե նրանք այդ ընթացքում չհիշեցին իրենց ուսանողին, ինչո՞ւ պետք է նրա նկարները մնային այնտեղ »,- նշեց տիկին Կարինեն:
Թագուհի Հակոբյան
Forrights.am-ը «Լրագրողներ հանուն մարդու իրավունքների» ՀԿ-ի իրավական-լրատվական կայքն է:
Մեր առաջնահերթ նպատակը մարդու իրավունքների պաշտպանությունն է հրապարակայնացման միջոցով: