ՄԻԵԴ վճիռները կհանդիսանան դատավորների լիազորությունների կասեցման հիմք

24

Մարդու իրավունքների եվրոպական դատարանի՝ Հայաստանի դեմ կայացրած վճիռները կարող են առիթ հանդիսանալ Հայաստանի դատավորների նկատմամբ կարգապահական վարույթ հարուցելու, ընդհուպ լիազորությունների դադարեցման համար: Կառավարության առաջարկությամբ ««Դատական օրենսգիրք» սահմանադրական օրենքում փոփոխություններ և լրացում կատարելու մասին» օրենքի նախագիծը Ազգային ժողովում ներկայարեց արդարադատության փոխնախարար Գրիգոր Մինասյանը:

Մինչ փոփոխություններին անդրադառնալը արդարադատության փոխնախարարը նշեց, որ նախագծի նախնական տարբերակով առաջարկվում է միջազգային դատարանի որոշմամբ բացահայտված խախտումները դիտարկել որպես դատավորի պաշտոնի անհամատեղելիության հիմք՝ հնարավորություն ընձեռելով այդ հիմքով դադարեցնել դատավորի լիազորությունները:

Մինասյանի խոսքով՝  նախագիծը ներկայացվել է Վենետիկի հանձնաժողովին, վերջինիս կարծիքի հիման վրա այն էականորեն լրամշակվել է` սահմանելով այլ կառուցակարգ:

«Հստակեցվել է, որ այն դեպքում, երբ դատավորի կողմից արդարադատություն իրականացնելիս թույլ տված խախտումը հայտնաբերվել է, օրինակ, ՄԻԵԴ-ի վճռի ուսումնասիրության արդյունքում, ապա այդ հիմքով կարգապահական վարույթ կարող է հարուցվել խախտումը հայտնաբերելուց հետո 1 տարվա ժամկետում: Նախատեսվել է նաև, որ այս դեպքում կարգապահական վարույթ չի կարող հարուցվել, եթե, օրինակ, ՄԻԵԴ-ի վճռի ուժի մեջ մտնելուց հետո անցել է 15 տարի»,- նշեց փոխնախարարը:

Նախագծի անցումային դրույթներով նախատեսվում է կարգավորում, որ կարգապահական վարույթ կարող է հարուցվել նաև մինչև օրենքի ուժի մեջ մտնելը կայացված ՄԻԵԴ ակտերով արձանագրված կամ բացահայտված խախտումներ։ Այս դեպքում ևս գործում է մինչև 15 տարվա վաղեմության պայման։

«Այս կարգավորման առնչությամբ անհրաժեշտ է նկատի ունենալ, որ ՀՀ իրավական համակարգը հիմնված է եղել այն ընդհանուր տրամաբանույան վրա, որ արդարադատություն իրականացնելիս նյութական դատավարական նորմի ակնհայտ և կոպիտ խախտումը, այդ թվում այն դեպքերում, երբ այդ խախտումը հաստատվում էր ՄԻԵԴ ակտով, դատավորի նկատմամբ կարգապահական պատասխանատվության հիմք է, իսկ այդ խախտումները կարող էին հանգեցնել լիազորությունների դադարեցման»։