Ադրբեջանական կողմի արձակած կրակոցից Արցախի Մարտակերտ քաղաքում քաղաքացիական անձ է զոհվել, «Ազատությանը» փոխանցեց Արցախի նախագահի մամուլի քարտուղար Լուսինե Ավանեսյանը:
Նրա խոսքով` դեպքը տեղի է ունեցել այսօր` ժամը 13:20-ի սահմաններում, քաղաքացին գյուղատնտեսական աշխատանքներ կատարելիս է եղել Մարտակերտի մերձակայքում:
Արցախի ոստիկանությունը տեղեկացնում է, որ զոհվածը Մարտակերտի բնակիչ էր` Արամ Տեփնանցը, այս պահին տեղում աշխատում են իրավապահ մարմինները:
Ադրբեջանի պաշտպանական գերատեսչությունը հերքում է այս լուրը նշելով. «Տրակտորի վարորդի մահվան մասին տեղեկությունը, որն իբր Ադրբեջանի զինված ուժերի կողմից արձակված կրակոցների հետևանքով է մահացել, սուտ է և չի համապատասխանում իրականությանը», — ասել են նախարարությունից:
Արցախի մարդու իրավունքների պաշտպանի զեկույցի համաձայն` անցած մեկ տարում Ադրբեջանի զինուժը սպանել է Արցախի 80 քաղաքացիական անձի, որից 38-ին՝ գերության մեջ կամ իր վերահսկողության ներքո: Ըստ Արցախի ՆԳՆ խոսնակի` սա առաջին քաղաքացիական զոհն է նոյեմբերի 9-ի հրադադարից հետո:
Forrights.am-ը «Լրագրողներ հանուն մարդու իրավունքների» ՀԿ-ի իրավական-լրատվական կայքն է:
Մեր առաջնահերթ նպատակը մարդու իրավունքների պաշտպանությունն է հրապարակայնացման միջոցով: