Նյութեր են նախապատրաստվում՝ ԴԱՀԿ նախկին պետ Միհրան Պողոսյանի կողմից կեղծ տեղեկանք ներկայացնելու առնչությամբ. լրագրողների հետ զրույցում այսօր հայտարարել է փոխոստիկանապետ Արա Ֆիդանյանը։

Պաշտոնական տվյալներով՝ պետությանը շուրջ 1,5 միլիոն դոլարի վնաս հասցրած և շուրջ 2 տարի հետախուզման մեջ գտնվող Միհրան Պողոսյանն ընտրություններին կմասնակցի «Պատիվ ունեմ» դաշինքով՝ ցուցակի 11-րդ տեղում է, ԿԸՀ-ն արդեն գրանցել է նրան որպես պատգամավորի թեկնածու։

Որպեսզի ԴԱՀԿ նախկին պետը ոստիկանությունից ստանար վերջին 4 տարում ՀՀ քաղաքացի համարվելու և վերջին 4 տարում Հայաստանում բնակվելու մասին անհրաժեշտ տեղեկանք, տարիներ առաջ Պանամայի օֆշորային սկանդալի կիզակետում հայտնված Պողոսյանի լիազոր ներկայացուցիչը ոստիկանության անձնագրային և վիզաների վարչություն է տարել դիմում, ըստ որի նախկին պաշտոնյան որոշ ժամանակ սովորել է Մոսկվայի պոլիտեխնիկական համալսարանում։ Ոստիկանությունը մերժել է դիմումը, հիմնավորելով, որ տեղեկանքում նշված ժամանակահատվածը չի բավարարել, որպեսզի վերջինիս տրամադրվի վերջին 4 տարում ՀՀ-ում բնակվելու մասին տեղեկանք։ Մեկ օր անց նոր տեղեկանք է ներկայացվել՝ կրկին Մոսկվայի պոլիտեխնիկական համալսարանից, որով հավաստվել է, որ Պողոսյանը նույն համալսարանում նաև նախապատրաստական կուրսեր է անցել։ Երկրորդ դիմումի պատասխանը դեռ չստացած՝ Պողոսյանի ներկայացուցիչը դիմել է դատարան, հայցը բավարարվել է։

«Դատարանը պարտավորեցրել էր անձնագերերի և վիզաների վարչությանը տրամադրելու տեղեկանք, իսկ դատարանի կայացրած որոշումը վարչությունը չէր կարող չկատարել: Ներկայումս այդ փաստով, ինչպես նշեցի, ստուգումներ են իրականացվում և նախապատրաստում են նյութեր, ընդամենը երկու օր առաջվա դեպք է», — ասաց Ֆիդանյանը:

Forrights.am-ը «Լրագրողներ հանուն մարդու իրավունքների» ՀԿ-ի իրավական-լրատվական կայքն է:

Մեր առաջնահերթ նպատակը մարդու իրավունքների պաշտպանությունն է հրապարակայնացման միջոցով:

Pin It on Pinterest