Շուշիի շրջանի Հին Շենում շրջափակման մեջ հայտնված Շիրակի մարզի կամավորները տուն են վերադարձել: Այս մասին հայտնում է մարզից ընտրված պատգամավոր Սոֆյա Հովսեփյանը, ով «Իմ քայլը» խմբակցության մեկ այլ պատգամավորի` Նազելի Բաղդասարյանի հետ տեղում է եղել:
Հովսեփյանը ֆեյսբուքյան էջում գրել է, որ Մեծ Շեն և Հին Շեն գյուղերում ամեն ինչ նորալ է, ճանապարհները բաց են, տեղում խաղաղապահներ կան:
«Շիրակի մարզի 72 հոգանոց խումբը ճանապարհվեց դեպի տուն։ Ամեն ինչ կարգին է, և հերթափոխն էլ հավուր պատշաճի կազմակերված էր։
Բոլորին տեսել ենք, բոլորն էլ լավ էին և ժամերի ընթացքում կլինեն մարզում», — գրել է նա։
Օրեր առաջ Հին Շեն տանող ճանապարհի վրա ադրբեջանցիները հենակետ էին դրել, ապա ռուսական խաղաղապահ զորակազմի միջամտության արդյունքում ճանապարհից հեռացվել էր այն, և Հին Շենն ապաշրջափակվել էր:
Հիշեցնենք նաև, որ մինչ այժմ որևէ տեղեկություն հայտնի չէ Խծաբերդի հատվածում գերեվարվածների մասին:
Երեկ կառավարության նիստում փոխվարչապետ Տիգրան Ավինյանը հայտնել էր, թե գերեվարվածների տվյալները դեռ ճշտվում են, ու այդ նպատակով Արցախ է մեկնել Հայաստանի զինված ուժերի գլխավոր շտաբի պետը։
Դրանից մեկ օր առաջ Արցախի պաշտպանության բանակը հայտարարել էր, որ Խծաբերդ-Հին Թաղեր հատվածում անհայտ է մնում 73 մարդու ճակատագիր, երեկ ուշ երեկոյան էլ տեղեկացրին, որ Պաշտպանության բանակին է փոխանցվել նույն հատվածի դիրքերի տարածքում հայտնաբերված 9 հայ զինծառայողի մարմին։
Զոհվածների անունները մինչ այս պահը չեն հայտարարվել։
Forrights.am-ը «Լրագրողներ հանուն մարդու իրավունքների» ՀԿ-ի իրավական-լրատվական կայքն է:
Մեր առաջնահերթ նպատակը մարդու իրավունքների պաշտպանությունն է հրապարակայնացման միջոցով: