Ռուսաստանի և Ֆրանսիայի նախագահներ Վլադիմիր Պուտինը և Էմանյուել Մակրոնը հեռախոսով քննարկել են ռուս-հայ-ադրբեջանական եռակողմ համաձայնության արդյունքում Լեռնային Ղարաբաղում իրավիճակի կայունացման հարցը:
Ռուսաստանի ղեկավարը ֆրանսիացի գործընկերոջը պատմել է Լեռնային Ղարաբաղում ռուսաստանցի խաղաղապահների տեղակայման ընթացքի մասին:
«Վլադիմիր Պուտինը տեղեկություններ է փոխանցել միջնորդական ակտիվ ջանքերի՝ շփման գծի երկայնքով և Լաչինի միջանցքում խաղաղապահներ տեղակայելու մասին, ինչը թույլ է տվել դադարեցնել արյունահեղությունը և խուսափել նոր զոհերից»,- ասվում է Կրեմլի հրապարակած հաղորդագրությունում:
Ռուսաստանի նախագահը Ֆրանսիայի նախագահին ասել է, որ «իրավիճակը տարածաշրջանում հիմնականում կայունացել է»:
Երկու նախագահները քննարկել են նաև փախստականների ապահով վերադարձի կազմակերպման, ենթակառուցվածքների վերականգնման, ինչպես նաև քրիստոնեական եկեղեցիների պահպանման անհրաժեշտությունը:
Forrights.am-ը «Լրագրողներ հանուն մարդու իրավունքների» ՀԿ-ի իրավական-լրատվական կայքն է:
Մեր առաջնահերթ նպատակը մարդու իրավունքների պաշտպանությունն է հրապարակայնացման միջոցով: