Սննդամթերքի անվտանգության պետական ծառայությունում, որն այսօր վերակազմավորումների փուլում է, որոշել են ազատվել 15 տարուց ավելի քաղաքացիական ծառայության ստաժ ունեցող Արմեն Վարդանյանին, որը վերջին տասը տարիներին այս ծառայության մեթոդոլոգիայի և մոնիթորինգի վարչության պետն է եղել: Վարչությունը վերացված է, իսկ Արմեն Վարդանյանին ուղարկել են կադրային ռեզերվ:
Այսօր արժեքավոր մասնագետին, որը ոլորտի օրենսդրության ստեղծմանն ա ակտիվորեն մասնակցել, հարյուրավոր բարդ փաստաթղթեր է գրել, ձևական առաջարկ են արել՝ տեսուչ աշխատել Գեղարքունիքի մարզում:
«Այն վարչությունը, որի ղեկավարն էր Արմեն Վարդանյանը, լուծարվել է, իրեն առաջարկվել է աշխատանք, ինքը հրաժարվել է։ Առաջարկը մոտ էր իր բնակավայրին», — ասում է ՍԱՊԾ մամուլի պատասխանատու Անուշ Մարտիրոսյանը։
Արմեն Վարդանյանը դեռևս գյուղատնտեսության նախարարության կազմում լինելու տարիներից ծառայության ամենաակտիվ մասնագետներից էր, համարձակ հարցազորւյցներ էր տալիս, պարզաբանումներ ԶԼՄ-ներին: Այսօր հայտնվել է անցանկալիների շարքում:
Փորձառու մասնագետից ազատվելու համար, ըստ Արմեն Վարդանյանի, ընտրել են լայնորեն կիրառվող տարբերակ՝ դիտավորյալ ցածր են գնահատել նրա կատարողականները:
«Ծառայության պետի պաշտոնը զբաղեցնող Գեորգի Ավետիսյանն իմ գրավոր պահանջով չի ներկայացրել կատարողականիս ցածր գնահատման պատճառաբանությունը», — ասում է Արմեն Վարդանյանը: Նա իր վերաբերյալ որոշումը բողոքարկել է Ավետիսյանի վերադասին՝ ՀՀ վարչապետին, դիմում-նամակներ է հղել նրան, սակայն իր նամակներին գրասենյակից չեն պատասխանել:
Զանգահարել է վարչապետի գրասենյակ, տեղեկանալու համար իր դիմումների ընթացքի մասին, և նրան պատասխանել են, որ դիմումները մակագրվել են տեսչական մարմինների համակարգման գրասենյակ: «Ինչու՞, եթե դիմումները առնվազն քաղաքացիական ծառայողի կատարողականի գնահատմանն են վերաբերում, ինչը տեսչական մարմնի գործառույթների շրջանակից դուրս է», — հարցոնւմ է մասնագետը, ենթադրելով, որ քաղաքացիների նամակների և խնդիրների վերաբերյալ վարչապետին առհասարակ չեն զեկուցում:
Իսկ Նիկոլ Փաշինյանը, ինչպես բազմիցս համոզվել ենք, իրեն փողոցում, կամ որևէ այլ վայրում պատահական հանդիպող ու իրենց բողոքներով մոտեցող քաղաքացիներին հորդորում է դիմել իր աշխատակազմ՝ մի մարմին, որը, փաստորեն, ճշմարտությունը վարչապետին չի զեկուցում: «Չեմ ուզում մտածել, որ այդ թողտվությունը վարչապետի գիտությամբ է կատարվում», — ասում է Արմեն Վարդանյանը:
Նա համոզված է, որ իրենից ազատվելու պատճառը իր բարձրաձայնումներն այս մարմնի վատ աշխատանքի՝ թույլ տրվող խախտումների, հովանավորչության, ապօրինությունների:
«Վերջին երկու տարիների ընթացքում անընդհատ բաց խոսել եմ դրանց մասին, հստակ առաջարկություններ եմ արել, որոնք արձանագրված են էլեկտրոնային փաստաթղթաշրջանառության համակարգում: Բայց իմ բարձրացված հարցերը մնացել են անպատասխան: Կազմակերպված թևով ամեն ինչ արվել է ինձ առօրյա աշխատանքներում չներառելու, ոչինչ չհանձնարարելու, փաստաթղթաշրջանառությունից դուրս թողնելու համար», — ասում է Արմեն Վարդանյանը:
Նա անակնկալ բացահայտում է արել՝ պարզվում է, ներքին փաստաշրջանառության համակարգերի հսկողական լիազորություն և հնարավորություն ունեցող վարչապետի աշխատակազմը չի էլ կարդում այն:
Ի՞նչ եք սպասում վարչապետի գրասենյակից: «Արդեն որևէ բան չեմ ակնկալում, — Forrights.am-ին ասաց Արմեն Վարդանյանը, — Եթե մարդուն ուղարկում ես նամակը, չի պատասխանում, ի՞նչ անեմ, հո չե՞մ գնալու, դռան մոտ կանգնեմ, սպասեմ: Պետական կառավարման ապարատում անտարբեր վիճակ է: Քաղծառայությունը վերածվել է ստրուկների ինստիտուտի»: Ի՞նչ է անելու հետո: Գնալու է Գեղարքունիքի մարզ՝ տեսչական աշխագտանքի:
«Ես բոլոր առաջարկները կուսումնասիրեմ, նոր վերջնական որոշում կկայացնեմ», — պատասխանեց Վարդանյանը: Եթե համարժեք առաջարկ չստանա, փորձագիտական ՀԿ կհիմնի: Վստահ է՝ իր փորձը մարդկանց անհրաժեշտ է:
Սյուզան Սիմոնյան
Forrights.am-ը «Լրագրողներ հանուն մարդու իրավունքների» ՀԿ-ի իրավական-լրատվական կայքն է:
Մեր առաջնահերթ նպատակը մարդու իրավունքների պաշտպանությունն է հրապարակայնացման միջոցով: