Այս պահին ունենք կորոնավիրուսի 290 ախտորոշված դեպք, երկու պացիենտի վիճակը գնահատվում է ծայրահեղ ծանր. նրանցից մեկը ԱՄՆ քաղաքացի է, ազգությամբ հայ չէ. մյուսը ՀՀ քաղաքացի է: Այս մասին, այսօր՝ մարտի 26-ին, կառավարության նիստում հայտարարեց ՀՀ վարչապետ Նիկոլ Փաշինյանը:
Նրա խոսքով, երկուսն էլ գտնվում են տարիքային բարձր խմբում՝ 75-ից բարձր տարիք ունեն, գտնվում են վերակենդանացման բաժանմունքում:
«Այս ընթացքում ունեցել ենք 18 առողջացման դեպք: Մոտ 100 քաղաքացիներ մեկուսացված ռեժիմից դուրս են եկել: Նրանց մոտ ախտորոշումը բացասական է եղել, չեն էլ հիվանդացել: Այսօր էլ սպասում ենք առողջացման եւ ապամեկուսացման դեպքերի»,-ասաց Փաշինյանը:
Նա նշեց նաև, որ այսօրվա ընթացիկ խնդիրը հիվանդանոցային հզորությունները ճիշտ կառավարելն է, քանի որ հիվանդանոցներում կան պացիենտներ, որոնք բուժում չեն ստանում։
Վարչապետը տեղեկացրեց` առավոտյան ՀՀ առողջապահության նախարար Արսեն Թորոսյանի և պարետ Տիգրան Ավինյանի հետ քննարկում է տեղի ունեցել և որոշվել է, որ թեթև դեպքերը, որոնք մեծամասնություն են կազմում, կտեղափոխվեն հյուրանոցներ։
«Սա ձեռնտու կլինի նաև հյուրանոցներին, քանի որ դրանք հիմա դատարկ են։ Ինչ–որ գին կպայմանավորվենք ու կաշխատենք հյուրանոցների հետ։ Հյուրանոցների սենյակների հետ ոչ մի վատ բան չի կատարվի այդ պացիենտների` այնտեղ լինելու հետևանքով։ Բոլոր սենյակները պարբերաբար ախտահանվում են»,–ասաց Փաշինյանը։
ՀՀ առողջապահության նախարար Արսեն Թորոսյանն էլ հայտնեց, որ 7 վայրերում, որտեղ պահում են մեկուսացվածներին, ախտահանում են ու սանիտարահիգիենիկ առումով վերահսկողությունը շատ խիստ է։
Փաշինյանը հավելեց նաև, որ կորոնավիրուսի հաղթահարումը Հայաստանում վատագույն սցենարով տեղի չի ունենում, ավելին, այն աշխարհում արձանագրված լավագույն սցենարներին շատ մոտ է։
Forrights.am-ը «Լրագրողներ հանուն մարդու իրավունքների» ՀԿ-ի իրավական-լրատվական կայքն է:
Մեր առաջնահերթ նպատակը մարդու իրավունքների պաշտպանությունն է հրապարակայնացման միջոցով: