Վերաքննիչում սկսվեց Պողոս Պողոսյանի սպանության գործով դատավճռի դեմ բողոքի քննությունը

393

Վերաքննիչ քրեական դատարանում, նախագահությամբ դատավոր Ռուբիկ Մխիթարյանի, կազմով՝ Կարեն Մարդանյանի, Արմեն Բեկթաշյանի, այսօր սկսվեց դատախազության բողոքի քննությունը՝ Պողոս Պողոսյանի սպանության գործով դատապարտված Աղամալ Հարությունյանի վերաբերյալ մեղադրական դատավճիռը բեկանելու և նոր դատաքննություն նշանակելու պահանջով:

Այսօրվա դատական նիստին Աղամալ Հարությունյանի պաշտպան Ռոբերտ Բեջանյանը հայտնեց, որ գործի նյութերին ծանոթ չէ եւ միջնորդեց այն հետաձգել: Նիստին ներկա էր նաև Աղամալ Հարությունյանը: Վերջինս առարկեց տեսանկարահանմանը, ինչպես նաև չպատասխանեց լրագրողների հարցերին։

Դատարանում էր նաև Պողոս Պողոսյանի եղբորորդին՝ Սամվել Պողոսյանը: Եթե գործը վերաբացելու մասին որոշում կայացվի, ամենայն հավանականությամբ, նա կներգրավվի որպես տուժողի իրավահաջորդ: Նշենք, որ նախկինում Պողոս Պողոսյանի իրավահաջորդը եղել է Սամվել Պողոսյանի հայրը՝ Անդրանիկ Պողոսյանը, վերջինս, սակայն մահացել է:

Սամվել Պողոսյանը լրագրողների հետ զրույցում ասաց, որ հետամուտ են լինելու, որպեսզի տարիներ առաջ տեղի ունեցած միջադեպի մեղավորները պատասխանատվության ենթարկվեն: Հայտնեց նաև, որ սրճարանում տարիներ առաջ տեղի ունեցածին, ըստ իրենց ունեցած տեղեկությունների, մասնակից է եղել ոչ միայն Աղամալ Հարությունյանը, այլ շուրջ 8 անձ, որոնց ինքը չի ճանաչում:

Պողոսյանը քիչ հավանական համարեց, որ վերը նշված անձինք կարող էին առանց Ռոբերտ Քոչարյանի հրամանի՝ սեփական նախաձեռնությամբ Պողոս Պողոսյանին պատժել, սակայն չպնդեց, որ Ռոբերտ Քոչարյանը հենց սպանելու հրահանգ է տվել այդ անձանց:

«Ես կարող եմ իմ սուբյեկտիվ կարծիքն ասել, կարծում եմ՝ առանց նրա հրամանի չէին կարող իրականացնել: Առանց հրահանգի չէին գնա»,-անդրադառնալով Ռոբերտ Քոչարյանի առնչության առթիվ հարցին՝ ասաց Պողոս Պողոսյանի եղբորորդին՝ հավելելով, որ չի կարող ոչինչ բացառել, սակայն հավանականությունը շատ քիչ է, որ սեփական նախաձեռնությամբ նման բան անեն:

Պողոս Պողոսյանի սպանությունից հետո Ռոբերտ Քոչարյանը ափսոսանք էր հայտնել՝ հայտարարելով, որ «եթե Պողոս Պողոսյանը ողջ լիներ, ինքը դեռ ասելու բան կունենար»: 

«Նախագահը էն ժամանակ էլ հեռուստացույցով ինչ- որ բաներ ասել է, որ եթե կենդանի լիներ, մի երկու բան էլ ավելի կուզեի ասել: Թող գա, տեսնենք ինչ էր ուզում ասել»,-այսօր ասաց սպանվածի եղբորորդին: Նա ակնկալում է, որ հրաման տվողների մասով գործով ևս բացահայտում կլինի: «Միանշանակ, եթե հրաման տվող եղել է, ուրեմն պետք է պատժվի: Եթե չի եղել, բնականաբար մարդուն չենք պահանջում պատժել»,-ասաց նա:

2001 թվականին մայրաքաղաքի «Առագաստ» սրճարանում սպանվել էր Վրաստանի քաղաքացի, 43-ամյա դաշնակցական Պողոս Պողոսյանը՝ այդ ժամանակ նախագահ Ռոբերտ Քոչարյանին «Պրիվետ Ռոբ» արտահայտությամբ դիմելուց հետո։ Ըստ քրեական գործի, նրան ծեծի էր ենթարկել Աղամալ Հարությունյանը սրճարանի զուգարանում։

Դատարանի 2002թ. փետրվարի 21-ի դատավճռով ամբաստանյալ Աղամալ Հարությունյանը դատապարտվել է 2 տարի ժամկետով ազատազրկման, միաժամանակ նշանակված պատիժը պայմանականորեն չի կիրառվել և սահմանվել է փորձաշրջան՝ 1 տարի ժամանակով:

Այժմ Գլխավոր դատախազությունը պնդում է, որ ի հայտ են եկել նոր հանգամանքներ՝ գործը վերաբացելու և նոր մեղադրյալներ ներգրավելու համար։

Բեկանելու դեպքում գործը կուղարկվի Երևանի ընդհանուր իրավասության դատարան՝ նոր քննության։

Դատական հաջորդ նիստը նշանակվեց մարտի 27-ին: