Ահազանգ. 15 օր հացադուլի մեջ գտնվող դատապարտյալի առողջական վիճակը կտրուկ վատացել է

1128

Շուրջ 15 օր հացադուլի և 4 օր ջրադուլի մեջ գտնվող «Նուբարաշեն» ՔԿՀ-ի դատապարտյալ Արկադի Պապյանի առողջական վիճակն այս պահին ծանր է. այսօր երկու անգամ նա կորցել է գիտակցությունը: Պապյանը երեկվանից հրաժարվել է նաև տրամադրվող բուժօգնությունից:

Նման ծայրահեղ քայլով նա բողոքում է Գլխավոր դատախազության կողմից առաջադրված «կեղծ մեղադրանքի» դեմ: Օրեր առաջ ջրադուլ հայտարարելու մասին դիմումում դատապարտյալը նշել էր՝ ջրադուլ է հայտարարում, քանի որ Գլխավոր դատախազությունը մամուլում սուտ տեղեկություններ է հրապարակում իր վերաբերյալ:

Մարդու իրավունքների պաշտպանի գրասենյակից՝ Forrights-ի հետ զրույցում նշեցին, որ այս պահին չեն կարող պատասխանել՝ ՄԻՊ ներկայացուցիչներն այցելե՞լ են դատապարտյալին, թե՝ ոչ: Պաշտպանի գրասենյակի պատասխանը կհրապարակենք ստանալուն պես:

Գլխավոր դատախազի խորհրդական Գոռ Աբրահամյանը Forrights-ին հայտնեց, որ դատախազությանից դեռ հացադուլի 4-րդ օրն են այցելել Արկադի Պապյանին և հորդորել դադարեցնել հացադուլը.

«Արկադի Պապյանի հացադուլի ընթացքը դատախազության ուշադրության կենտրոնում է: Դատախազության համապատասխան վարչությունը մշտական կապի մեջ է «Նուբարաշեն» ՔԿՀ-ի վարչակազմի հետ: Վաղը նախատեսված է մեղադրանքը պաշտպանող դատախազի այցելությունը հացադուլի և ջրադուլի մեջ գտնվող անձին՝ չնայած այն հանգամանքին, որ դատախազության կողմից ձեռնարկվել են բոլոր միջոցները հացադուլից նրա հրաժարվելու համար և բոլոր առիթներն օգտագործել է պարզաբանելու դատաքննության ընթացքում իր դատավարական իրավունքները լիարժեք իրացնելու հնարավորության մասին: Իրավիճակից ելնելով՝ կքննարկվեն նաև նրա նկատմամբ բժիշկական հսկողությունն ուժեղացնելու տարբերակները»,- նշեց Աբրահամյանը:

Հիշեցնենք, որ դատապարտյալը պնդում է, թե Գլխավոր դատախազությունը կրկին «վերհիշել է իր չկատարած հանցանքի և կարված մեղադրանքի» մասին և ուզում է նորից մեղսագրել իրեն չկատարած հանցանքը:

Ռոզա Վարդանյան