Հայաստանի «Կյանքի խոսք» ավետարանական եկեղեցին օրերս դիմել է ՀՀ ազգային անվտանգության ծառայությանը՝ խնդրելով քրգործ հարուցել կրոնական թշնամանք հրահրելու հիմքով՝ հաշվի առնելով «Դուխով Հայաստան» ֆեյսբուքյան կեղծ էջի և «Բլոգնյուզ» լրատվական կայքի հրապարակումները։

Այս մասին Forrights.am-ի հետ զրույցում ասաց եկեղեցու մամուլի խոսնակ, կրոնագետ Արմեն Լուսյանը: Ըստ նրա՝ խնդիրն այն է, որ օգոստոս ամսին «Ֆեյսբուք» սոցիալական ցանցում բացվել է «Դուխով Հայաստան» կեղծ էջը, որում պարբերաբար տարածվում են «սուտ տեղեկություններ, իրականացվում է հակապետական քարոզչություն և բորբոքվում է կրոնական թշնամանք»՝ հատկապես Հայաստանի «Կյանքի Խոսք» ավետարանական եկեղեցու, վերջինիս հովվի և եկեղեցու անդամների նկատմամբ։

««Բլոգնյուզ» լրատվական կայքն ու դրա գլխավոր խմբագիր Կոնստանտին Տեր-Նակալյանն էլ, ակնառու դիտավորությամբ «Դուխով Հայաստան» կեղծ էջը վերագրելով «Կյանքի Խոսք» եկեղեցուն, ներկայացրել են, թե իբր եկեղեցին իրականացնում է հակահայկական քարոզչություն»,-մանրամասնեց Արմեն Լուսյանը՝ շարունակելոց. «Այդ ֆեյսբուքյան էջում ՀՀ ազգային հերոս Մոնթեն ներկայացվում է որպես դավաճան, ադրբեջանցիները՝ եղբայր, վարչապետ Նիկոլ Փաշինյանը՝ հող հանձնող, իսկ այս ամենի հեղինակ՝ «Կյանքի Խոսք» եկեղեցին։ Ավելին՝ սեպտեմբերի 20-ին տվյալ կեղծ էջի օգտատերերը, տեղադրելով «Կյանքի Խոսք» ավետարանական եկեղեցու հովվի նկարը և նշելով նրա անուն ազգանունը, կատարել են սուտ, զրպարտող և կրոնական ատելություն հրահրող հրապարակում»։

Իսկ սեպտեմբերի 15-ին «Բլոգնյուզ» լրատվական կայքը, հղում կատարելով վերոնշյալ էջին, հրապարակել է «Մոնթեն՝ դավաճան, ադրբեջանցիները՝ եղբայր․ «Կյանքի խոսքը», շահարկելով Նիկոլ Փաշինյանի անունը, բացահայտ հակահայկական քարոզ է անում» վերտառությամբ հոդվածը: Դրանում, ըստ Արմեն Լուսյանի, պնդումներ են արվել, որ «Դուխով Հայաստան» էջը «Կյանքի Խոսք» եկեղեցունն է, ինչի մասին իբրև թե վկայում է այն փաստը, որ այդ էջի «Տեղեկություններ» բաժնում նշված է «Կյանքի Խոսք» եկեղեցու 010 238330 հեռախոսահամարը։

«Սա այն դեպքում, երբ այդ հեռախոսահամարն ավելի քան 2 տարի է չի պատկանում «Կյանքի Խոսք» եկեղեցուն և այդ համարով զանգահարելիս էլ օպերատորի ինքնապատասխանիչը հայտնում է, որ «համարը միացված չէ կայանին»,-նշեց Լուսյանը։

Ըստ Արմեն Լուսյանի՝ «Բլոգնյուզ» կայքի խմբագիր Կոնստանտին Տեր-Նակալյանի կողմից «ակնհայտ սուտ տեղեկության տարածումը և կրոնական ատելության քարոզչությունը» եկեղեցու հանդեպ չի դադարեցվել անգամ «Կյանքի Խոսք» եկեղեցու պաշտոնական հերքումից հետո, ուստի իրենց այլ ճանապարհ չի մնացել, քան դիմել իրավապահներին՝ խնդրելով պարզել իրականությունը, կեղծ էջի ու «Բլոգնյուզի» միջև հնարավոր կապը և պաասխանատվության կանչել մեղավորներին:

««Բլոգնյուզի» ֆեյսբուքյան էջի՝ տվյալ հոդվածի հրապարակման տակ տարբեր անձանց կողմից կրոնական ատելության կոչեր են եղել՝ «կյանքի խոսքականների» հասցեին հնչող սպառնալիքներով»,-նշեց Լուսյանը:

Կրոնական թշնամանք հարուցելու դիտավորությունն ավելի ակնհայտ է դարձել, երբ «Դուխով Հայաստան» կեղծ էջի օգտատերերը սեպտեմբերի 20-ին տեղադրել են «Կյանքի Խոսք» ավետարանական եկեղեցու հովվի նկարը և նշելով նրա անուն ազգանունը՝ կատարել Հայ Առաքելական եկեղեցու դեմ ուղղված հրապարակում։

«Այդ զրպարտչական հրապարակմամբ էջի օգտատերերը նպատակ են հետապնդում «Կյանքի Խոսք» եկեղեցուն և վերջինիս հովիվ Արթուր Սիմոնյանին ներկայացնել ոչ միայն որպես հակապետական, այլ նաև որպես հակաառաքելական կառույց և անձ։ Ավելին, փորձում են տպավորություն ստեղծել, որ ներկայիս կառավարության բոլոր անդամները «Կյանքի Խոսք» եկեղեցու հետևորդներ են, ինչը նույնպես չի համապատասխանում իրականությանը»,-ասաց Արմեն Լուսյանը։

Եկեղեցու խոսնակի խոսքով՝ այսպիսի գործողությունները ոչ միայն սահմանված են ՀՀ քրեական օրենսգրքի 226 հոդվածով որպես քրեորեն պատժելի արարք, այլև դրանք հղի են այլ վտանգավոր հետևանքներով, մասնավորապես՝ դրանք կարող են հանգեցնել եկեղեցու անդամների նկատմամբ ատելության շարժառիթով հանցագործությունների կատարմանը կամ բռնկմանը:

«Այս ամենը մեզ հիմք է տալիս ունենալու ողջամիտ կասկածներ, որ ներկայումս գործում է կազմակերպված խումբ, որի նպատակն է կրոնական թշնամանք և ատելություն բորբոքել «Կյանքի Խոսք» եկեղեցու, վերջինիս հովվի և հետևորդների նկատմամբ»,- ասաց Լուսյանը:

Ուստի «Կյանքի խոսք»-ը ԱԱԾ-ին խնդրել է, ղեկավարվելով ՀՀ քրեական օրենսգրքի 226-րդ հոդվածով՝ կրոնական թշնամանք հարուցելուն ուղղված գործողությունների կատարման մասով, հարուցել քրեական գործ, կատարել լրիվ, օբյեկտիվ և բազմակողմանի քննություն և պարզել հետևյալ հարցերը՝ ովքե՞ր են «Դուխով Հայաստան» ֆեյսբուքյան էջի օգտատերերը, ինչո՞ւ են ներկայանում որպես «Կյանքի Խոսք» եկեղեցու էջ՝ տարածելով հակապետական և հակաառաքելական տեղեկություններ, այն դեպքում, երբ որևէ կապ չունեն եկեղեցու հետ, ինչո՞ւ են Արթուր Սիմոնյանի անունից և նրա նկարով գրառում կատարել, եթե Արթուր Սիմոնյանը երբևէ նման հայտարարություն չի արել:

«Նաև ԱԱԾ-ին խնդրել ենք քննությամբ պարզել՝ արդյոք այդ անձինք որևէ կերպ փոխկապակցվա՞ծ են կամ նախնական համաձայնությա՞մբ են գործում «Բլոգնյուզ» կայքի և դրա գլխավոր խմբագրի հետ, ո՞վ է այն ընթերցողը, ով իբրև թե զանգահարել է 010 238330 հեռախոսահամարով և իրեն վստահեցրել են, որ դա «Կյանքի Խոսք» եկեղեցու էջն է, պարզել՝ արդյոք նման զանգ կատարվե՞լ է, թե՞ ոչ, և արդյոք «Բլոգնյուզ» կայքի և դրա խմբագրի կողմից չի՞ կատարվել փաստերի և տեղեկությունների դիտավորյալ խեղաթյուրում՝ հանրությանը մոլորության մեջ գցելու և «Կյանքի Խոսք» եկեղեցու նկատմամբ ատելություն հրահրելու նպատակով»,- եզրափակեց Արմեն Լուսյանը։

Մարինե Խառատյան

Forrights.am-ը «Լրագրողներ հանուն մարդու իրավունքների» ՀԿ-ի իրավական-լրատվական կայքն է:

Մեր առաջնահերթ նպատակը մարդու իրավունքների պաշտպանությունն է հրապարակայնացման միջոցով:

Pin It on Pinterest