Մայր Աթոռն արձագանքել է Քննչական կոմիտեի՝ վեց եպիսկոպոսի մեղադրանքի առաջադրման որոշմանը՝ կոչ անելով ՀՀ իշխանությանը և իրավապահ համակարգին հարգել Եկեղեցու ինքնավարության իրավունքը։
Մայր Աթոռը hունվարի 31-ին տեղի ունեցած հոգևորականների նկատմամբ իրականացվող գործողությունները բռնաճնշումներ է որակում․ «Մայր Աթոռը խստորեն դատապարտում է ՀՀ Սահմանադրության և օրենքների բացահայտ խախտումներով իշխանությունների հերթական միջամտությունը Եկեղեցու ներքին գործերին, որով քրեական վարույթ է նախաձեռնվել և քրեական հետապնդում է հարուցվել Գերագույն Հոգևոր Խորհրդի հոգևորական անդամների նկատմամբ՝ դատական ակտի կատարմանը խոչընդոտելու մեղադրանքով»։
Հունվարի 31-ին Քննչական կոմիտե էին հրավիրվել Մակար, Հովնան, Նաթան, Հայկազուն, Մուշեղ և Վահան սրբազանները, տեր Մովսես քահանան: Նրանք բոլորը մեղադրյալներ են, նրանց նկատմամբ խափանման միջոց է ընտրվել բացակայելու արգելքը։ Քրեական հետապնդման շրջանակներում արգելափակվել է Գերագույն Հոգևոր Խորհրդի եպիսկոպոս անդամների ելքը երկրից։
«Այս դատապարտելի գործընթացը մեր պետության օրենքներով և միջազգային պայմանագրերով ամրագրված մարդու հիմնարար իրավունքների կոպտագույն խախտում է, որի նպատակն է խաթարել Հայ Առաքելական Եկեղեցու բնականոն գործունեությունը, մասնավորաբար առաջիկայում Ավստրիայում գումարվելիք եպիսկոպոսական ժողովի աշխատանքները»,- նշված է հաղորդագրության մեջ։
Մայր Աթոռը կոչ է անում ՀՀ իշխանությանը և իրավապահ համակարգին գործել բացառապես ՀՀ Սահմանադրության և օրենքի շրջանակներում և հարգել Եկեղեցու ինքնավարության իրավունքը։
Forrights.am-ը «Լրագրողներ հանուն մարդու իրավունքների» ՀԿ-ի իրավական-լրատվական կայքն է:
Մեր առաջնահերթ նպատակը մարդու իրավունքների պաշտպանությունն է հրապարակայնացման միջոցով: