Սիրիայի հայկական համայնքը Հայաստանից աջակցություն է ակնկալում․ Ազատություն

Սիրիայում շուրջ երկու շաբաթ ծավալվող դրամատիկ իրադարձությունների ընթացքում Հայաստանի կառավարությունը որևէ կերպ աջակցե՞լ է հայ համայնքին։ Սփյուռքի հանձնակատար Զարեհ Սինանյանն «Ազատության» հետ զրույցում նշում է․ «Էնպես չի, որ կառավարությունը կարող է ինչ-որ բան անել ու չի անում, իրավիճակը շատ արագ էր զարգանում, հեղհեղուկ էր, և կառավարությունը, ինչպես բոլորը, նույնիսկ արձագանքելու հնարավորություն չի ունեցել իրատեսական»:

Սփյուռքի հանձնակատարն ասում է՝ օրինակ, Հալեպից Դամասկոս փախած 14 ընտանիքների համար տոմսեր էին ձեռք բերել, որպեսզի նրանք կարողանային Դամասկոսից դեկտեմբերի 14 -ին մեկնել Երևան, բայց զինյալների կողմից Սիրիայի մայրաքաղաքը վերցնելուց հետո իրավիճակը փոխվեց։ Ըստ Սինանյանի՝ դեկտեմբերի 14-ին Դամասկոսից դեպի Երևան չվերթը ավիաընկերությունը դեռ չի չեղարկել։

Սփյուռքի հանձնակատարն ասում է, որ հենց այդ չվերթից 24 ժամ առաջ և հետո, պարզ կլինի, թե ինչպիսի տրամադրություններ կան Հալեպում և Դամասկոսում, մարդիկ ուզո՞ւմ են Հայաստան տեղափոխվել, թե՝ ոչ։

Ամեն դեպքում Սինանյանը վստահեցնում է՝ Լիբանանում Հայաստանի դեսպանատան թեժ գծին զանգահարող սիրիահայերի թիվը վերջին օրերին կտրուկ նվազել է, մարդիկ հիմնականում զանգահարում են երկրից դուրս գալու, հայկական անձնագրերի, քաղաքացիությանն առնչվող հարցերով։