Երևան քաղաքի ընդհանուր իրավասության քրեական դատարանի դատավոր Արամայիս Ասատրյանի որոշմամբ փոխվեցին «Հունիսի 12-ի» գործով կալանքի տակ գտնվող մեղադրյալների խափանման միջոցները։
Բավարարելով պաշտպանների միջնորդությունները՝ դատավորն այսօր մեկնարկած դատական լսումների ընթացքում փոխեց կալանքի տակ գտնվող 4 մեղադրյալի խափանման միջոցները ՝ կիրառելով բացակայելու արգելք։ Տնային կալանքի տակ գտնվող 8 մեղադրյալի խափանման միջոցները նույնպես փոխվեցին բացակայելու արգելքով, նրանք ազատ արձակվեցին դատական նիստերի դահլիճից։
Նշենք, որ գործով անցնում է 16 մեղադրյալ։
Ավելի վաղ NEWS.am-ը հայտնել էր, որ մեկնարկել են հունիսի 12-ին Բաղրամյան-Դեմիրճյան փողոցների խաչմերուկում ոստիկանական ուժերի հետ բախումների հետևանքով խաղաղ անհնազանդության ակցիայի մասնակիցների դեմ հարուցված գործով նախնական դատալսումները։
Ըստ մեղադրանքի՝ Նարեկ Պետրոսյանին, Վաչիկ Խաչատրյանին , Կարմեն Մնացականյանին, Արմենակ Խաչատրյանի,Լևոն Սաֆարյանին, Ավետիք Ջիլավյանին , Սամվել Բաղդասարյանին, Տիգրան Սարիբեկյանին, Նաիրա Մինասյանին,Երվանդ Աղաբալյանին, Հարություն Մելիքյանին, Արմեն Հովսեփյանին, Կոնստանտին Տեր-Մովսեսյանին, Տիգրան Կլեկչյանին, Սևակ Սիմոնյանին առաջադրված է մեղադրանք ՀՀ քրեական օրենսգրքի 297-րդ հոդվածի 2-րդ մասի 1-ին կետով` մի խումբ անձանց կողմից խուլիգանության հատկանիշներով: Մեղադրյալներից միայն Էդգար Յուխանաևն է մեղադրվում ՀՀ քրեական օրենսգրքի 327-րդ հոդվածի` զանգվածային անկարգությաններին մասնակցելու հատկանիշներով:
Հիշեցնենք, որ հունիսի 12-ին Բաղրամյան պողոտայում՝ ԱԺ շենքի մոտ, տեղի ունեցած ակցիայի ժամանակ ոստիկանության կողմից հավաքի մասնակիցների նկատմամբ ուժի կիրառման հետևանքով շուրջ 101 անձ ստացել էր տարբեր մարմնական վնասվածքներ, այդ թվում՝ քաղաքացիներից մեկը կիրառված հատուկ միջոցների հետևանքով կորցրել էր դաստակը:
Forrights.am-ը «Լրագրողներ հանուն մարդու իրավունքների» ՀԿ-ի իրավական-լրատվական կայքն է:
Մեր առաջնահերթ նպատակը մարդու իրավունքների պաշտպանությունն է հրապարակայնացման միջոցով: