Արցախի Հանրապետության պետնախարարի նախկին խորհրդական Արտակ Բեգլարյանը թվիթերյան իր էջում կատարած գրառման մեջ նշել է, որ իր տեղեկությունների համաձայն՝ Ռուսաստանի Կարմիր խաչի մարդասիրական օգնությունը չի հասել Արցախ՝ նախապես չհամաձայնեցված ադրբեջանական լրացուցիչ խոչընդոտների և պայմանների պատճառով։
Ըստ Բեգլարյանի՝ ռուսական օգնությունը ներկայումս արգելափակված է Ադրբեջանում, իսկ Լաչինի միջանցքը մնում է ամբողջությամբ արգելափակված։
«Արցախյան կողմն ընդունել է Ադրբեջանի տարածքով մարդասիրական օգնության հասանելիություն տրամադրելու ռուսական առաջարկը՝ պայմանով, որ Լաչինի միջանցքը բացվի Կարմիր խաչի միջազգային կոմիտեի և ռուս խաղաղապահների կողմից մարդասիրական մատակարարումների համար։ Ռուսական Կարմիր Խաչը փորձում է ռուսական արտադրության ապրանքներ մատակարարել ռուսական մեքենաների միջոցով։ Սակայն Ադրբեջանը մշտապես վերջին պահին արգելափակում է բոլոր նախաձեռնությունները՝ անընդհատ փորձելով բարձրացնել իր բանակցային շեմը և ձգձգել գործընթացը՝ միաժամանակ շարունակելով ցեղասպանությունը և պահելով ճնշումը արցախյան կողմի վրա։ Բոլոր միջազգային դերակատարների համար հրամայական է հրապարակայնորեն փաստագրել ադրբեջանական կողմի ապակառուցողական պահվածքը՝ անցնելով զուտ խոսքերից անդին և գործնական ճնշում գործադրելով նրա վրա։ Ցեղասպան ռեժիմների հետ բանակցությունների և միջնորդության ստանդարտ մոտեցումը հավասարազոր է մեղսակցության»,- գրել է Ա. Բեգլարյանը` հետգրության մեջ նշելով, որ ինքն այլևս պաշտոնական անձ չի հանդիսանում, և իր հայտարարությունները ոչ պաշտոնական և փորձագիտական կարծիքներ են։
Հիշեցնենք, որ Ռուսաստանի Դաշնության կառավարությունը հանդես էր եկել Արցախի Հանրապետությանը հումանիտար օգնություն տրամադրելու նախաձեռնությամբ:
Forrights.am-ը «Լրագրողներ հանուն մարդու իրավունքների» ՀԿ-ի իրավական-լրատվական կայքն է:
Մեր առաջնահերթ նպատակը մարդու իրավունքների պաշտպանությունն է հրապարակայնացման միջոցով: