Պարեկային ծառայության ղեկավարն ազատվել է պաշտոնից

Ներքին գործերի նախարարության պարեկային ծառայության ղեկավար Արթուր Ումրշատյանն ազատվել է զբաղեցրած պաշտոնից։

Թե ի՞նչ պատճառաբանությամբ, Ներքին գործերի նախարարության լրատվական ծառայությունից չմանրամասնեցին։

Ումրշատյանը Պարեկային ծառայության ղեկավարի պաշտոնին նշանակվել էր 2021 թ. հուլիսի 7–ին։Մինչ այդ՝ 2019-2021 թթ. եղել է ՀՀ ոստիկանության զորքերի հասարակական կարգի պահպանության գնդի (թիվ 1032 զորամաս) հրամանատար։

Փետրվարի 10-ի ուշ երեկոյան համացանցում տեսանյութ տարածվեց, թե ինչպես են ոստիկանության աշխատակիցները Երևանի Հանրապետության հրապարակում փորձում կանգնեցնել արծաթագույն ամենագնացի վարորդին:

Ավտոմեքենան նախ Կառավարության շենքի մայթեզր բարձրացավ, հետո թեքվեց դեպի Արտգործնախարարության նախկին շենք: Այդ ընթացքում Ոստիկանության աշխատակիցներին չէր հաջողվում կանգնեցել մեքենան, կադրում կրակոցների ձայներ էին լսվում: Ավելի ուշ ոստիկանությունը հաղորդեց, որ «Համերի» 25-ամյա վարորդը հայտնաբերվել ու ձերբակալվել է։ Սոցիալական ցանցերում քննադատության սլաքներն ուղղվեցին Պարեկային ծառայությանը՝ մեքենան ժամանակին կանգնեցնել չկարողանալու համար։