«Բա ո՞ւր են մեր տղաները»

«Վարկ էինք վերցրել, գյուղում սպանդանոց սարքել Շավարշի անունով է։ Ամեն ինչ պատրաստ է, կարող ես դուռը բացել ու սկսել, բայց չենք աշխատացնում, սպասում ենք տղայիս, հավատում եմ, որ կգա»,- ասում է Բարսեղ Ավդալյանը։

44-օրյա պատերազմում անհետ կորած Շավարշ Ավդալյանը Արմավիրի մարզի Դալարիկ գյուղից է, արդեն երկու տարի է, ինչ նրանից որեւէ լուր չկա:

2020թ․-ի արցախյան 44-օրյա պատերազմի օրերին Ավդալյանների ընտանիքի կրտսեր որդին՝ Շավարշը  զինկոմիսարիատից ծանուցագիր էր ստացել։

«Պավեստկա էր ստացել,  ներկայացել էր, տարել էին սկզբում Էջմիածին, հետո՝ Մեղրի, Կապան ու հոկտեմբերի 21-ին Զանգելան են տարել ավտոբուսներով ու հանձնել թշնամուն»,- պատմում է հայրը՝ Բարսեղ Ավդալյանը։

Պատերազմի առաջին օրերից Դալարիկ գյուղից Շավարշ Ավդալյանը եւ համագյուղացի պայմանագրային Ռուդիկ Ալեքսանյանը եղել են Էջմիածնի ՌՔԿՊ (ռադիացիոն, քիմիական, կենսաբանական պաշտպանության) զորքի հետ։ Հոկտեմբերի 14-ին մեկնել են Կապանի զորամաս։  Հոկտեմբերի 20-ին Կապանի զորամաս է ժամանել է ԶՈՒ գլխավոր շտաբի պետի տեղակալ, գեներալ-լեյտենանտ Անդրանիկ Մակարյանը եւ հրամանատարական կազմին ներկայացրել է իրավիճակը, թե  մի քանի կիլոմետրի վրա գտնվող Կովսական քաղաք ներթափանցել են ադրբեջանական խմբեր, հարկավոր է մի քանի խմբով մտնել, հայտնաբերել եւ ոչնչացնել թշնամու ստորաբաժանումները։

Պատերազմից հետո քրեական գործ է հարուցվել 2020թ․ հոկտեմբերի 21-ին Կովսականում տեղի ունեցած դեպքերի առթիվ։ Որպես մեղադրյալներ ներգրավված է 4 հոգի՝ Զինված ուժերի Գլխավոր շտաբի պետի նախկին տեղակալ Անդրանիկ Մակարյանը, զորամասի հրամանատար Արսեն Աբգարյանը, զորամասի շտաբի պետ Սարգիս Կուլակչյանը եւ զորամասի համալրման բաժանմունքի պետ Էլլադա Հարությունյանը։

Անդրանիկ Մակարյանը մեղադրվում է ռազմական դրության պայմաններում իշխանության անգործության, Արսեն Աբգարյանը՝ իշխանության անգործության եւ ծառայության նկատմամբ անփույթ վերաբերմունքի, Սարգիս Կուլակչյանը՝ իշխանության անգործությանն օժանդակելու, իսկ Էլլադա Հարությունյանը՝ պաշտոնեական կեղծիք կատարելու մեջ։

Բարսեղ Ավդալյանը ասում է` իրենց ձեռքի տակ կա երկու տեսանյութ, որտեղ երեւում է, թե ինչպես են ադրբեջանցի զինվորները գերեւվարում մեր տղաներին, որոնց մեջ պարզ երեւում է եւ Շավարշը.

«Բայց մինչեւ հիմա իրա անունը գերիների մեջ չկա, զոհերի մեջ էլ չկա: Ասում են` անհետ կորած է… Այս երկու տարին մեզ խաբել են, ասել են` լավ կլինի, սպասեք: Սպասեցինք, ու ի ՞ նչ… Նիկոլն ասում էր, բան չի լինի, գերիները երկու ամիս էլ կարող են սպասել: Էս հայտարարությունից հետո արդեն մի տարի անցավ:  Բա ո ՞ ւր են մեր տղաները»:

Անի Գևորգյան

Մանրամասները տեսանյութում՝