«Տառապել եմ ու մինչև կյանքիս վերջ տառապելու եմ կատարվածի համար բանտում, թե դրսում»

2718

Ցմահ դատապարտված Ստեփան Ներսիսյանը 3 երեխա ունի ու 6 թոռ: Նրանց տեսնում է տեսակցությունից տեսակցություն, լսում է կարճատև զանգերի ժամանակ:

«Կոնֆլիկտներ չի ստեղծում, շփվող անձնավորություն է, բարեկիրթ». բնավորության այս առանձնահատկությունները  բանտի վարչակազմը նշել է դատապարտյալի բնութագրում:

Ստեփանը ասում է, որ ապրում է մեխանիկորեն, աշխատում է համապատասխանել վաղաժամկետ ազատման համար բոլոր չափորոշիչներին՝ մասնակցում է բանտում կազմակերպված կիրառական արվեստի, «Հայագիտություն և մշակույթ» խորագրով դասընթացներին, համակարգչային հմտություններ ձեռք բերել, ներգրավվել ինքնագործ խմբերում: Սա դարձել է նրա կյանքի իմաստը:

70-ին մոտ մարդու ինչի՞ն են պետք դասընթացները, արդյո՞ք զուտ պայմանական վաղաժամկետ ազատման համար պահանջվող չափանիշներին բավարարելու, «գալոչկա՚»» դնելու համար

« Ոչ միայն: Դրանց միջոցով ես շփվում եմ մարդկանց հետ, հանդիպում եմ արվեստագետների, մտավորականների, քաղաքական գործիչների »,- ասում է դատապարտյալը:

Ստեփանը պատվոգրեր, հավաստագրեր, դրական բնութագրեր ունի:  Բայց և այնպես չգիտի, ողջ է ինքը, թե մահացած: 25 տարի բանտում է: Ասում է, որ դատապարտվել է մեկ անձի ցուցմունքով, սպանության մեջ չի մեղադրվել, սակայն սպանողի հետ կրում է նույն պատիժը՝ ցմահ ազատազրկում: Ասում է, որ զղջում է, որ օրեր, ամիսներ ու տարիներ մտածել է իր արարքի մասին: Նա քիչ է խոսում, պատմում, դժվար է արտաբերում բառերը:

«Պետությունը ինձ կերակրում է, ինձ ծաղիկներով զբոսահրապարակ են տանում, հեռուստացույց են տրամադրել: Ոնց որ ծերանոցում ապրեմ» — ասում է Ստեփանը: Նա գտնում է, որ իրեն պատժելու իմաստը կորել է: «Ես հիվանդություններ ունեմ, եթե դուրս գամ բանտից, երկար չեմ ապրելու: Գոնե էդ մի քանի տարին թողնեն, գնամ, թոռներիս տեսնեմ», — ասում է:

Ստեփան Ներսիսյանի վաղաժամկետ պայմանական ազատման հարցը քննելով, դատարանը նրա երջանկության  հարցն է լուծում:

Տուժող կողմը ընդունում է, որ Ստեփանը չի սպանել, բայց և այնպես դեմ է նրա ազատմանը:

«Տուժող կողմին պետք է ըմբռնումով վերաբերվել, նրանց կորուստը անդառնալի է: Բայց դատարանը պետք է հաշվի առնի, որ ես 25 տարի պատժվել եմ արդեն իմ արարքի համար: Խորապես զղջում եմ, որ առնչվել եմ սպանությանը: Ես տառապել եմ ու մինչև կյանքիս վերջ տառապելու եմ կատարվածի համար բանտում, թե դրսում՚ »- խոստովանում է Ստեփանը:

Քաղաքացիական հայցով պահանջվող 1 մլն դրամից 300 հազար դրամը Ստեփանը մուծել է: Կատարել է ստեղծագործական աշխատանքներ և վաստակած գումարը փոխանցել է տուժողին: Մնացած մասն էլ պարտավորվել է վճարել:

Հ.Գ. Ցհամ ազատազրկման դատապարտված Ստեփան Ներսիսյանին պայմանական վաղաժամկետ ազատելու հարցի վերաբերյալ  ՀՀ ԱՆ Քրեակատարողական ծառայությունը 2022 թվականի հունվարի 13-ին կազմել է դրական զեկույց: Արձանագրվել է, որ չափորոշիչների գումարման արդյունքում նա ստացել է 28 միավոր: Պրոբացիայի ծառայությունն իր զեկույցում հանգել է եզրակաղցության, որ Ստեփան Ներսեսյանը պատժի կրման ընթացքում դրսևորել է դրկան վարքագիծ, քարորդ դար առաջ գործած հանցագործության համար խորապես զղջում է, ընունել է իր մեղքը:

Սյուզան Սիմոնյան