Շարունակվում է Դավիթ Տոնոյանի և մյուսների գործով դատական նիստը. պաշտպանները պնդում են՝ մեղադրյալների խափանման միջոցը պետք է փոխվի

219

Երևանի ընդհանուր իրավասության դատարանում շարունակվում է ՀՀ պաշտպանության նախկին նախարար Դավիթ Տոնոյանի և մյուսների գործով դատական նիստը: Նիստը շարունակվում է դռնփակ ձևաչափով:

Փաստաբան Երեմ Սարգսյանը լրագրողների հետ զրույցում հայտնեց, որ մեղադրյալների պաշտպանները դատարանում ներկայացրել են հիմնավորումները, որ մեղադրվող անձինք պետք է ազատ արձակվեն և նրանց կալանքի տակ պահելու հիմքեր չկան: «Դատախազները ներկայացրին իրենց հիմնավորումները, թե ինչու նրանք պետք է շարունակեն կալանքի տակ գտնվել»,-ասաց Սարգսյանը:

Նա հավելեց, որ յուրաքանչյուր ամբաստանյալի կալանքի տակ գտնվելու մասով փորձում են հիմնավորումներ ստանալ, քանի որ մեղադրող կողմի հիմնավորումները վերացական են: «Նշվում է, որ ազատության մեջ հայտնվելու դեպքում  նրանք կարող են խոչընդոտել գործի քննությանը: Հիմա ուզում ենք հասկանալ, թե ինչու այս խնդիրը կա յուրաքանչյուր ամբաստանյալի մասով»,- մանրամասնեց Սարգսյանը:

Նա հիշեցրեց, որ գործով կան այլ մեղադրյալներ, որոնց դեպքում նախաքննության մարմինն այլ խափանման միջոցներ է կիրառել: