Ռուս խաղաղապահներն ավարտին կհասցնեն հայ գերիների վերադարձը, հարցը պետք է ամբողջությամբ փակվի. Մուրադով

Լեռնային Ղարաբաղի հակամարտության ժամանակ ադրբեջանական կողմի բոլոր զինծառայողները վերադարձվել են ռուս խաղաղապահների աջակցությամբ, հայ գերիներին վերադարձնելու աշխատանքներն այս պահին շարունակվում են: Այս մասին ՏԱՍՍ-ին հայտնել է Հարավային ռազմական օկրուգի զորքերի հրամանատարի տեղակալ Ռուստամ Մուրադովը։

«Այսօրվա դրությամբ ադրբեջանական կողմի բոլոր զինծառայողները վերադարձվել են, և հայ ռազմագերիներին վերադարձնելու աշխատանքը շարունակվում է, այս հարցում կա դրական տեղաշարժ, կա ըմբռնում: Մենք պատրաստ ենք շարունակել այդ աշխատանքը», – ասել է նա: Կարծում եմ, որ այդ հարցը պետք է ամբողջությամբ փակվի։ Եվ ռուս խաղաղապահները այդ գործը ավարտին կհասցնեն», – ասել է Մուրադովը։

Նա նշել է, որ գերիներին վերադարձնելու աշխատանքը գնահատում է որպես խաղաղապահի քաղաքացիական պարտք:

«Որպես զինվորական՝ ես հասկանում եմ, թե ովքեր են ռազմագերիները, ինչ զգացողություններ են ունեցել գերության մեջ գտնվելիս։ Ես հիշում եմ առաջին չվերթը, երբ մենք մեկնեցինք Բաքու, և վերադառնալուց հետո ես տեսա այն զինծառայողների դեմքերը, երբ նրանք արդեն Երևան էին թռչում՝ Էրեբունի օդանավակայան։ Դրանք արցունքներ էին, նրանք չէին հավատում, որ նրանք տուն են վերադարձել», – պատմել է փոխնախարարը։

***

Մինչ նոյեմբերի 16-ի Սյունիքի սահմանին տեղի ունեցած մարտերն Ադրբեջանում հայ գերիների ընդհանուր թիվը, ըստ պաշտոնական տվյալների, կազմել է 40 մարդ, այդ թվում՝ 37 զինծառայող և 3 խաղաղ բնակիչ: Այս մասին, մասնավորապես, հայտարարել է աշխատանքի և սոցիալական հարցերի նախարար Նարեկ Մկրտչյանը։

Նոյեմբերի 16-ից հետո գերիների մասին պաշտոնական տվյալները չեն թարմացվել, սակայն Մարդու իրավունքների եվրոպական դատարանում հայ գերիների շահերի ներկայացուցիչ Սիրանուշ Սահակյանի տվյալներով՝ նրանց թիվը հասել է 70-ի։ ՀՀ վարչապետ Նիկոլ Փաշինյանը Facebook–յան էջում նոյեմբերի 23-ին կազմակերպված մամուլի ասուլիսի ժամանակ հայտնել է, որ, չճշտված տվյալներով, նոյեմբերի 16–ից հետո գերեվարվել է 32 հայ զինծառայող:

Դեկտեմբերի 4-ին Ադրբեջանը հայկական կողմին է հանձնել տասը հայ զինծառայողների, որոնք գերեվարվել էին նոյեմբերի 16-ին հայ-ադրբեջանական սահմանի Սյունիքի հատվածում տեղի ունեցած զինված բախման ժամանակ։

Այսպիսով, Ադրբեջանից վերադարձած գերիների թիվը հասավ 124-ի, նրանց թվում են և՛ զինծառայողներ, և՛ քաղաքացիական անձինք։