«Հայրս մարմնով ինձ ծածկեց, ինքը զոհվեց, ես ողջ մնացի». hայր և որդի պատերազմի դաշտում

187

Արցախյան 44-օրյա պատերազմի ընթացքում հայրը մարմնով ծածկել է որդուն, զոհվել, բայց փրկել տղայի կյանքը: 

Արցախյան առաջին պատերազմի մասնակից Գագիկ Ավետիսյանը պատերազմի մասին լուրը ստանալուց անմիջապես հետո մեկնել է առաջնագիծ՝ 20-ամյա որդու մոտ: 

«Ես չհասցրեցի զանգել տուն, առաջին օրը ժամանակ չեղավ, երկրորդ օրն արդեն պապաս եկավ»,- պատմում է Ավետ Ավետիսյանը: 

Ավետը 44-օրյա պատերազմի մեկնարկին շուրջ մեկ ու կես տարվա ժամկետային զինծառայող է եղել: Ծառայել է Եղնիկներում:  Թշնամում դեմ սեպտեմբերի 28-ից սկսած ապքարել է նաեւ հոր հետ: 

«Սեպտեմբերի 28-ից մինչեւ հոկտեմբերի 21 միասին ենք եղել, 21-ին զոհվեց»,- ասում է Ավետը: Տղան հիշում է, որ 2020 թվականի հոկտեմբերի 21-ին Եղնիկների դիրքերը հերտանակոծվել են գրավյալ Մատաղիսից՝ հայկական կողմի զինամթերքով: 

«Մատաղիսի կողմից այդ օրը խփեցին մեր դիրքին: Մի պահ աչքերիս դեմը սեւացել էր, հետո բացեցի աչքերս տեսա, որ բոլորը պարկած են գետնին: Հրթիռը որ տրաքեց պապաս դեմն էր կանգնած, ինձ փակեց ասկոլկեկից: Պապաս հենց առաջին վայրկյանից զոհվեց»,- ասում է Ավետը եւ նշում, որ սկզբից չի մտածել, որ հայրը զոհվել է, այլ կարծել է՝ վիրավոր է: 

Պատերազմը Եղնիկներում սկսվել է 2020 թվականի սեպտեմբերի 27-ի առավոտյան ժամը 07:00-ին: Պատերազմն ընդհատել է զինվորների նախաճաշը:  

«Նստել էինք, որ հարց ուտեինք եւ հենց այդ ժամանակ էլ սկսեցին կրակել ու ժամանակ չեղավ ուտելու, հելանք կրակելու: Սկզբի մի քանի օրն էր անսովոր, հետո սովորական դարձավ, առավոտը հելնում կրակում էինք, երեկոյան՝ քնում էինք, բայց մեկ-մեկ լինում էր որ գիշերն էլ էին կրակում»,- հիշում է Ավետը եւ նշում՝ պատերազմի մասին սեպտեմբերի 26-ի ուշ  գիշերն է ընկերոջ հետ խոսել,  ընկերն ասել է՝  պատերազմ է սկսվելու: 

«Առավոտ 07:00-ին սկսեցին կրակել: Համ վախենալու էր, համ ադրենարին կար, անհասկանալի իրավիճակ էր»: 

Եղնիկներն այժմ էլ հայկական է մնացել: Պատերազմի ընթացքում մի քանի դիրք են կորցրել, բայց հետո հաջողվել է հետ բերել: 

«Մեր մոտ ուզում էին նահանջ տալ, բայց վերջին պահին հրամանատարը փոշմանեց: Մեզ նահանջի հրաման ուզում էին տալ, երբ Մատաղիսն արդեն գրավել էին»:

Նարեկ Կիրակոսյան