Վրաստանի իշխանությունները օպերատորի մահը կապում են թմրանյութերի չարաշահման հետ

Վրաստանի ներքին գործերի նախարարությունը հայտնել է, որ փորձաքննության միջանկյալ տվյալները վկայում են, որ վրացական հեռուստաալիքի օպերատոր Ալեքսանդր Լաշկարավայի մահվան հավանական պատճառ է դարձել թմրանյութերի չարաշահումը:

«Քիմիական փորձաքննության եզրակացության համաձայն` Ալեքսանդր Լաշկարավայի մարմնից վերցված փորձանմուշները պարունակել են մորֆին, կոդեին, տետրահիդրոկանաբինոլ, գաբապենտին և մոնոացետիլմորֆին տեսակի թմրանյութեր: Փորձաքննության համաձայն` մահվան պատճառ կարող էր հանդիսանալ թմրանյութերի չափից մեծ քանակով օգտագործումը: Հարկ է նշել, որ այս եզրակացությունը միջանկյալ է»,- Новости-Грузия-ի փոխանցմամբ` ասվում է ՆԳՆ հայտարարության մեջ:

Գերատեսչության տվյալներով` Լաշկարավան մահվանից մեկ օր առաջ դեղատնից հոգեմետ դեղեր և մեկանգամյա օգտագործման ներարկիչներ է ձեռք բերել: Հետաքննությունը պարզել է, որ Լաշկարավան մի քանի անգամ թմրանյութեր է ձեռք բերել ընկերոջ հետ և դրանց օգտագործումից հետո վատացել է:

Հիշեցնենք, որ մահացել է վրացական «Փիրվելի» հեռուստաընկերության օպերատոր Ալեքսանդր (Լեքսո) Լաշկարավան, որը հուլիսի 5-ին Թբիլիսիում ծեծի էր ենթարկվել ԼԳԲՏ երթի հակառակորդների կողմից։ Ինչպես հայտնել է հեռուստաընկերությունը, Լաշկարավայի մարմինը կիրակի օրը՝ հուլիսի 11-ի առավոտյան իր տանը հայտնաբերել էր օպերատորի մայրը։ 

Լաշկարավան ծեծի էր ենթարկվել հուլիսի 5-ին «Ամոթ» քաղաքացիական շարժման շքամուտքում՝ ծայրահեղական խմբերի ներկայացուցիչների հարձակման արդյունքում։ Նրա հետ եղել էր լրագրող Միրանդա Բագատուրիան։ Հարձակումից հետո օպերատորը BBC-ին տված հարցազրույցի ժամանակ հայտարարել էր, որ հարվածել են դեմքին և գլխին։  

Human Rights Watch միջազգային իրավապաշտպան կազմակերպության ներկայացուցիչ Գիորգի Գոգիան Լաշկարայի մահվանից հետո իր թվիթերյան էջում գրառում է կատարել ողբերգական դեպքի մասին, նշելով. «Մահվան իսկական պատճառը պետք է դեռ պարզվի և հաստատվի: Բայց արագ հաշվետվողականությունը պարտադիր է, մասնավորապես՝ անհապաղ անհրաժեշտություն է իշխանության պատասխանատվությունը՝ դատապարտելու բռնությունը»: