Կախվելու փորձ կատարած դատապարտյալին տեղափոխել են քաղաքացիական հիվանդանոց

149

ՀՀ քրեականարողական ծառայության ղեկավարությունը վերջապես արձագանքեց Forrigts.am-ի 10.05 «Հիվանդանոցի պետը դիտավորյալ անտանելի պայմաններ է ստեղծում դատապարտյալի համար» հոդվածին:  Դատապարտյալ Հայկ Գալստյանին տեղափոխեցին քաղաքացիական հիվանդանոց: Այս մասին մեզ հայտնեցին դատապարտյալի հարազատները: 

 Հիշեցնենք՝ Հայկ Գալստյանին, որն ունի սրտի իշեմիկ հիվանդություն, թոքերի խնդիր, նաև  հոգեկան պաթոլոգիա, ապրիլի 30-ին տեղափոխել են դատապարտյալների հիվանդանոց՝ բժիշկ Աննա Դանիելյանի ցուցումով, սակայն «Դատապարտյալների հիվանդանոց» ՔԿՀ պետ Արտակ Սարգսյանը, որը ՀՔԾ պետ Սասուն Խաչատրյանի մորաքրոջ տղան է, հրաժարվել է կատարել բժշկի ցուցումը, չի տեղափոխել Գալստյանին թերապեւտիկ բաժանմունք, այլ պահել է և փակ ռեժիմային խցում, զրկել է պատշաճ բուժում ստանալու, անգամ մաքուր օդ շնչելու իրավունքից, ապա առանց բժշկի ցուցումի հետ է ուղարկել հիվանդին «Նուբարաշեն» ՔԿՀ: Արտակ Սարգսյանը լարված հարաբերություններ ու վաղեմի թշնամանք ունի Հայկ Գալստյանի հետ:

Պատճառը, ըստ դատապարտյալի հարազատների, երկու տարի առաջ նրանց միջև տեղի ունեցած կոնֆլիկտը: Արտակ Սարգսյանը հայհոյել է Հայկ Գալսըյանին, իսկ վերջինս նրան հարվածել է, ինչի համար դատապարտվել է քրեական օրենսգրքի «Ծեծ» հոդվածով: 

Դատապարտյալը փորձել էր վերջ տալ կյանքին, կախվելով խցում սավանի միջոցով, իսկ այն բանից հետո, երբ նրան փրկեցին, կարել է զույգ աչքերը և մայիսի 11-ին հացադուլ էր հայտարարել:

Նույն օրը Հայկ Գալստյանին «Նուբարաշեն» ՔԿՀ-ից տեղափոխել են «Էրեբունի» բժշկական կենտրոն: Նա դադարեցրել է հացադուլը: 

«Էրեբունի» ԲԿ-ում դատապարտյալին զննել է սրտաբանը, ախտորոշվել է  բարձր ճնշում, լարման կայուն ստենոկարդիա:

«Նրանք ուզում էին պառկեցնել ամուսնուս «Էրեբունիում», բայց նա հրաժարվել է այնտեղ պառկելուց, քանի որ նա առաջ այնտեղ պառկել էր և գոհ չի եղել բժիշկներից ու այնտեղի գներից: Խորհուրդ են տվել բուժումը շարունակել «Դատապարտյալների հիվանդանոցում»», — հայտնեց դատապարտյալի կինը:

Այսօր Հայկ Գալստյանին կրկին տեղափոխել են «Դատապարտյալների հիվանդանոց» ՔԿՀ: 

Սյուզան Սիմոնյան