«Փաշինյանի թերթում իմ մասին՝ «Անմեղ մարդը մահվան է դատապարտվել» վերնագրով հոդված է տպվել 20 տարի առաջ, ես դեռ բանտում եմ».ցմահ դատապարտյալ

132

Նիկոլ Փաշինյանը կա՛մ այն ժամանակ էր ստում, կա՛մ հիմա

«Կարող եմ ասել, որ ոչ բոլոր մեղավորներն են այսօր բանտում, բայց այսօր ՀՀ-ում անմեղ մարդիկ չկան բանտում»,- Նիկոլ Փաշինյանն այս միտքն առաջին անգամ հնչեցրեց ապրիլի 14-ին՝ Ազգային ժողովում, ապա նույն պնդումը շարունակեց անել շաբաթվա վերջին մարզային այցերի ընթացքում:

Ցմահ դատապարտյալները եւ իրավապաշտպանները Փաշինյանի այս հայտարարությունը քննադատում են՝ այն որակելով «պոպուլիստական» եւ «բարոյազուրկ»:

Նիկոլ Փաշինյանի հիմնադրած «Հայկական ժամանակ» օրաթերթի «Անմեղ մարդը մահվան է դատապարտվել» հոդվածաշարիի «հերոսը», որը  ցմահ դատապարտյալ է եւ 25 տարի է գտնվում է անազատության մեջ, Forrights.am-ի հետ զրույցում անհեթեթություն է որակում  Նիկոլ Փաշինյանի հայտարարությունը:

Նիկոլ Փաշինյանը «Հայկական ժամանակի» գլխավոր խմբագիրն էր, իր խմբագիր եղած տարիներին իր թերթում հետաքննական հոդվածաշար հրապարակվեց «Անմեղ մարդը մահվան է դատապարտվել» վերնագրով, մինչեւ հիմա այդ անմեղ մարդը այստեղ է, նստած է:  Իմ մասին է խոսքը: Ստացվում է՝ Նիկոլ Փաշինյանը կա՛մ այն ժամանակ էր ստում, կա՛մ հիմա»,- ասում է Forrights.am-ի զրուցակիցը եւ ընդգծում՝ «Նիկոլ Փաշինյանը պետք է բարոյականություն ունենար եւ լռեր»:

Ցմահ դատապարտյալն ասում է, որ  2018 թվականի հեղափոխությունից հետո դիմել է, որ իր գործը վերաբացեն, բայց, ինչպես նա է վստահեցնում՝ մերժել են, ասելով՝  երեւան եկած նոր հանգամանքներ չկան:

«Հեղափոխությունից հետո հույսեր արթնացան, բայց որքան շուտ արթնացավ, այդքան շուտ էլ մարեց: Տեսանք, որ գործ չեն անում, առաջընթաց չկա, ամեն ինչ բարդում են դատավորների վրա: Դուրս է գալիս՝ սաղ մեղավոր են, բացի կառավարությունից: Ոչ մի արմատական փոփոխություն չեղավ: Հեղափոխության առաջին տարում արդեն այդ հույսերը մեռան: Ինձ ասում են, որ քո գործով նոր հանգամանքներ չկան, բայց թող մի հատ հին հանգամանքներին գնահատական տան»,- նշեց նա:

Նիկոլ Փաշինյանը 2010-ին 2008 թվականի մարտյան դեպքերից հետո դատապարտվել էր 7 տարվա ազատազրկման, սակայն բանտում շուրջ երկու տարի անցկացնելուց հետո Սերժ Սարգսյանի համաներմամբ ազատ էր արձակվել: Նա մշտապես պնդել է, որ քաղբանտարկյալ է եղել, նախորդ իշխանություններն անօրինական են իրեն ազատազրկել: Այժմ տարօրինակ է, որ ինքը՝ Փաշինյանը, լինելով դատաիրավական համակարգի «զոհ», պնդում է՝ «անմեղ մարդիկ չկան բանտում»:

«Ի՞նչ պետք է զգամ Փաշինյանի այդ խոսքերը լսելուց հետո: Նիկոլ Փաշինյանը դառնում է ինձ անօրինական դատողներից, իմ գլխին սարքողներից մեկը»,- եզրափակում է ցմահ դատապարտյալը:

Նիկոլ Փաշինյանն իշխանափոխությունից առ այսօր բոլոր հնարավորություններն օգտագործելով հայտարարում է՝ դատական համակարգն անկախ չէ, գտնվում է Սերժ Սարգսյանի, Ռոբերտ Քոչարյանի եւ նախկին իշխանության այլ ներկայացուցիչներից կախվածության մեջ: Ըստ վարչապետի՝ պետք է անհապաղ փոխել դատական համակարգը: Նիկոլ Փաշինյանը դատարաններին չվստահելու ֆոնին անում է հայտարարություն, որ բանտերում անմեղ մարդիկ չկան: Նիկոլ Փաշինյանի միմյանց հակասող այս երկու հայտարարությունները, մեղմ ասած, տարակուսանք են առաջացնում: Հարց է առաջանում՝ ինչու է ցանկանում  բարեփոխել մի համակարգ, որի գործունեության արդյունքում, ըստ իրեն, որեւէ անմեղ մարդ չի հայտնվել ճաղերի հետեւում:

Հելսինկյան կոմիտեի փաստաբան Ռոբերտ Ռեւազյանը  Forrights.am-ի հետ զրույցում այս առնչությամբ ասաց. «Շատ դիպուկ հարցադրում եք անում: Եթե վարչապետը հայտարարում է, որ խնդիր ունենք դատական համակարգի հետ եւ մյուս կողմից էլ ասում է, որ ոչ մի սխալ չկա, ուրեմն ոչ մի խնդիր չունենք այս համակարգի հետ: Փաշինյանը սովորություն է դարձրել հայտարարի մի բան, անի մեկ այլ բան»:

Ռոբերտ Ռեւազյանը Փաշինյանի նմանօրինակ պնդումները որակում է պոպուլիստական հայտարարություն, որը վարչապետն արել է առանց մասնագիտական կարծիքները հաշվի առնելու:

«Մեր բանտերում կան 2000-ականներից ազատազրկված անձիք, աշխարհում դեռ որեւէ երկիր, որքան էլ իր դատական համակարգը զարգացած լինի, երաշխավորված չէ դատական սխալներից: Ես հեռու եմ այն մտքից, որ մեր իրավապահ համակարգը այն բարձրագույն աստիճանի վրա է կանգնած, որը ոչ մի սխալ թույլ չի տվել: Մենք դրանից շատ հեռու ենք կանգնած»,- ասում է փաստաբանը:

Ուշագրավ է՝ Նիկոլ Փաշինյանն այս հայտարությունն անելիս հաշվի չի առել այն հանգմանքը, որ, օրինակ, ցմահ դատապարտյալներից որոշ գործեր ուղարկվել են Մարդու իրավունքերի եվրոպական դատարան: Ռոբերտ Ռեւազյաը հարցադրում է անում՝ ինչ է հայտարարելու Նիկոլ Փաշինյանը, եթե ՄԻԵԴ-ը որոշի, որ նրանք անօրինական են ազատազրկված:

«Նիկոլ Փաշինյանը եթե ասում է, որ չունենք ոչ մի դատական սխալ, ապա նշանակում է՝ իր դեմ հարուցված քրգործն էլ է ճիշտ եղել, մնացած քաղաքական գործերն էլ: Ինձ հետաքրքիր է՝ եթե Եվրոպական դատարանից դատական ակտերը գան եւ այսօրվա որոշ գործեր սկսեն վերանայել, վարչապետն ինչ պատասխան է տալու դրան: Սա կալանավորված անձանց համար ուղղակի անմեղության կանխավարկածի խախտում էր վարչապետի կողմից»,- ասաց նա:

Նարեկ Կիրակոսյան