ՀՀ ԶՈՒ ԳՇ նախկին պետ Յուրի Խաչատուրովի ինքնազգացողությունը վատացել է։ ՀՀ երկրորդ նախագահ Ռոբերտ Քոչարյանի և մյուսների գործով դատական նիստի ընդմիջման ավարտից հետո այս մասին հայտնեց նախագահող դատավոր Աննա Դանիբեկյանը։
Ընդմիջման ընթացքում դատարան է ժամանել Շտապօգնության ավտոմեքենա՝ Խաչատուրովին բժշկական օգնություն ցուցաբերելու համար։
Նշենք, որ մինչ այդ պաշտպանը միջնորդություն է ներկայացրել՝ Յուրի Խաչատուրովի առողջական վիճակի հետ կապված, ինչը քննարկվել է դռնփակ կարգով։
Հաշվի առնելով Խաչատուրովի առողջական վիճակը՝ դատարանը որոշեց հետաձգել դատական նիստը։ Հաջորդ դատական նիստը նշանակվել է փետրվարի 23-ին՝ ժամը 13։00-ին։
Հիշեցնենք՝ սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։
Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու համար, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու համար։
Forrights.am-ը «Լրագրողներ հանուն մարդու իրավունքների» ՀԿ-ի իրավական-լրատվական կայքն է:
Մեր առաջնահերթ նպատակը մարդու իրավունքների պաշտպանությունն է հրապարակայնացման միջոցով: