«Բա մեր երեխեքը դրան էին արժանի, գոնե մարմինները հուղարկավորենք»․բողոքի ակցիա՝ ՌԴ դեսպանատան մոտ

151
Անհետ կորած զինվորների հարազատները ակցիան են իրականացնում ՌԴ դեսպանատան մոտ

Արցախում ռազմական գործողությունների ընթացքում անհետ կորած զինծառայողների ծնողներն ու հարազատները ակցիա են իրականացնում Հայաստանում Ռուսաստանի դեսպանատան մոտ:

«Հոկտեմբերի 3-ին ա տղաս զանգահարել, ասել ա՝ մեզ բարձրացնում են վերև, ուրիշ ոչ մի բան։ Ինքը ծառայում էր Մեղրի Ագարակ՝ տարի 4 ամիս։ Մենք լսել ենք, որ հրամանատարություն չի եղել, ասում են՝ հրամանատարները ոնց բարձրացրել են, այնպես էլ երեխեքի վրից անհետացել են։ Իմ երեխից ամսի 7-ին խաբար եկել ա, որ զոհվել ա ու ոչ մի բան։ Ոչ չաստից, որ մեկից ոչ մի տեղից ոչ մի ցավակցական խոսք, գոնե տեղյակ պահեն, գոնե զանգահարեն, ասեն՝ պատերազմ ա, այսպես ա եղել, ցավակցում ենք»,-վրդովված ասում է ակցիայի մասնակից զոհված զինծառայողի մայրը։

Տղայի անունը եղել է ամսի 9-ի զոհվածների ցուցակներում․ «Չգիտեմ, սկզբից չէինք հավատում, փաստորեն, ոչ մարմինը, ոչ տղաս առողջ չկա»,-ասած մայրը, մանրամասնելով, որ իր տղային, պատերազմից 10 օր առաջ Շնորհակալագրով պարգևատրել են։

«Որտեղ գնում ենք ոչինչ չեն ասում, մի տեղից մյուսն ենք գնում, ԴՆԹ թեստ էլ է ամուսինս տվել, մի խոսքով, ման ենք գալիս մեր որդուն․․․ ոչ մի բան, ոչ մի տեղեկություն»,-ասաց մայրը, հավելելով․ «Գոնե բերենք մեր երեխեքի մարմինները հուղարկավորենք։ Պատերազմ ա, հասկացանք, բա մեր երեխեքը դրան էին արժանի, գոնե մարմինները հուղարկավորենք։ Շատ բան ենք ուզում»,-ասաց նա։

«Եղբայրս կապի դուրս չի եկել հոկտեմբերի 2-ից, վերջին զանգը եղել է Ջեբրայիլից, նրա որդին՝ հոկտեմբերի 10-ից, Հադրութի տարածքից»,-այս մասին լրագրողների հետ զրույցում ասաց անհետ կորած զինծառայողների հարազատներից Արսեն Ղուկասյանը, որը փնտրում է եղբորն ու վերջինիս որդուն: Նրա խոսքով՝ մինչև անհետ կորած զինծառայողների հարցով միջգերատեսչական հանձնաժողովի ստեղծումը՝ փաստացի ոչինչ չի արվել:

«Կան տարածքներ, որ մտել, նայել են: Որոշ տարածքներ մտնել չի լինում: Փոխվարչապետին էլ ենք հարցրել, որ եթե Ադրբեջանի ղեկավարությունը որոշի չթողնել, ի՞նչ է լինելու: Ավինյանն ասաց՝ կա եռակողմ հայտարարություն, որի մեջ կետ կա, որ մինչև դեկտեմբերի 1-ը գործընթացը պետք է ավարտված լինի, բայց մի շաբաթում չեն հասցնի»,- ներկայացրեց անհետ կորածների հարազատը:

Նա հայտնեց, որ նաև ստորագրահավաք են անում, որ եթե հարցին լուծում չտրվի, փորձեն այն իրավական դաշտում լուծել: «Արդեն շուրջ 280 հոգի՝ անհետ կորածների հարազատներ, ստորագրել են: Ես պարոն Ավինյանին ասել եմ, որ եթե մենք տեսնենք՝ ոչ մի պետական տարբերակով ոչ մեկը չի արձագանքում, այս ամենը մտնելու է իրավական դաշտ: Մեր հարցը պետք է ոչ թե այսպես բանավոր լինի, այլ գրավոր: »,-ասաց նա:

Անդրադառնալով երեկ անհետ կորածների հարազատների՝ Կառավարությունում կայացած հանդիպմանը՝ Արսեն Ղուկասյանն ասաց, թե դրան մասնակցել է փոխվարչապետը, ՊՆ-ից ներկա է եղել միայն Վիտալի Ոսկանյանը՝ միջգերատեսչական հանձնաժողովի ղեկավարը: Ղուկասյանի խոսքով՝ նրանց առաջարկ է եղել ծնողների խումբ կազմել, որոնք անհրաժեշտության դեպքում կմասնակցեն Կառավարության նիստերի, կներկայացնեն տվյալները՝ քարտեզագրումների համար:

Ակցիայի մասնակիցները նամակ են պատրաստում, ինչպես նաև կազմում են անհետ կորած զինծառայողների անուններից բաղկացած ցուցակ՝ ՌԴ դեսպանատուն փոխանցելու համար:

Նրանք նամակով խնդրում են աջակցել Ադրբեջանի վերահսկողության տակ գտնվող տարածքում զինծառայողների որոնողական աշխատանքներն անհապաղ սկսելու հարցում:

Ակցիայի մասնակիցները սպասում են, որպեսզի դեսպանատնից որևէ մեկը մոտենա, լսի իրենց խնդիրները և վերցնի նամակն ու անհետ կորածների անուններով  ցուցակը:

Անհետ կորած զինվորների հարազատներն ավելի վաղ հավաքվել էին ՀՀ ՊՆ շենքի մոտ, որտեղ որոշ ժամանակ մնալուց հետո որոշեցին ակցիան շարունակել ՌԴ դեսպանատան մոտ: 

Նշենք, որ հավաքվաները իրենց բողոքի ակցիան շարունակում են Կառավարության դիմաց