Կարմիր խաչի միջազգային կոմիտեի ներկայացուցիչներն այցելել են Ադրբեջանում գտնվող հայ սպային

164
Գուրգեն Ալավերդյան

Կարմիր խաչի միջազգային կոմիտեի (ԿԽՄԿ) ներկայացուցիչներն այցելել են Ադրբեջանում գերության մեջ գտնվող սպա Գուրգեն Ալավերդյանին, «Ազատության» հարցին ի պատասխան տեղեկացրեց կոմիտեի հայաստանյան գրասենյակի հաղորդակցման ծրագրերի ղեկավար Զառա Ամատունին։

Վերջինս հայտնեց նաև, որ ԿԽՄԿ ներկայացուցիչները ստուգել են Գուրգեն Ալավերդյանի պահման պայմաններն ու առողջական վիճակը։ Ըստ Ամատունու՝ Գուրգեն Ալավերդյանին հնարավորություն է տրվել կապ հաստատել ընտանիքի անդամների հետ։ Նա նաև փոխանցեց, որ օգոստոս-սեպտեմբեր ամիսներին Կարմիր խաչի միջազգային կոմիտեի ներկայացուցիչները բացի Գուրգեն Ալավերդյանից, այցելել են նաև այն անձանց, որոնք Ադրբեջանում պահվում են անազատության մեջ:

Օգոստոսի 23-ին Հայաստանի պաշտպանության նախարարությունը տեղեկացրել էր, որ օգոստոսի 22-ին` ժամը 19:30-ի սահմաններում, մարտական հենակետը ստուգելու նպատակով սպա Գուրգեն Ալավերդյանը եղանակային խիստ անբարենպաստ պայմանների պատճառով շփոթվել և մոլորվել է: Ադրբեջանական կողմի հաղորդագրությունը, թե Ալավերդյանը հայկական դիվերսիոն-հետախուզական խմբի ղեկավար է, որը գերեվարվել է մարտի ընթացքում, հայկական կողմն ապատեղեկատվություն է որակում:

Օգոստոսի 22-ին ադրբեջանական կողմում հայտնվելուց հետո ադրբեջանական կայքերում հայ սպայի մասնակցությամբ երկու տեսանյութ հրապարակվեց։ Պաշտոնական Երևանը խստորեն դատապարտում է հայ ռազմագերու հանդեպ կիրառվող նվաստացնող վերաբերմունքը։