«ԱԱԾ-ում քննվող գործում առկա են դատավոր Կուբանյանին առաջադրված մեղադրանքի հակափաստարկները». պաշտպան

ՀՀ սնանկության դատարանի դատավոր Արա Կուբանյանի դեմ որևէ ցուցմունք չկա, նա բացարձակ կապ չունի մյուս դատավոր Գևորգ Նարինյանի գործի  հետ։ Այս մասին Forrights-ի հետ զրույցում հայտարարեց Կուբանյանի պաշտպան Կրոմվել Գրիգորյանը։

Դատավոր Կուբանյանին մեղադրանք է առաջադրվել ՀՀ քրեական օրենսգրքի 308-րդ հոդվածի 2-րդ մասով՝ պաշտոնեական լիազորությունները չարաշահել։ Ըստ Գրիգորյանի՝ ենթադրյալ խախտումը, տեղի է ունեցել 2019 թվականի վերջից 2020 թվականի սկզբի ընթացքում: Քրեական գործը, սակայն, վերջերս է հարուցվել. պաշտպանական կողմն այդ մասին տեղեկացել է հուլիսի 14-ին, երբ ԱԱԾ-ն դատարանի շենքում խուզարկություն է իրականացրել:

Պաշտպանը չկարողացավ պատասխանել մեր այն հարցին, թե կոնկրետ ինչ հատկանիշներով է արտահայտվում դատավորի պաշտոնեական լիազորությունը չարաշահելը․

«Մենք էլ դեռ մեղադրանքի որոշումից գլուխ չենք հանում։ Միայն այն կասեմ, որ իմ վստահորդն առաջադրված մեղադրանքում իրեն մեղավոր չի ճանաչում։ Նա այս մասին հայտնել է նաև քննիչներին, ինչից հետո էլ հարցեր չեն եղել տալու։ ԱԱԾ-ում վստահորդիս վերաբերյալ քննվող գործում արդեն իսկ առկա են նրան առաջադրված մեղադրանքի հակափաստարկները»,- նշում է Գրիգորյանը։

Պաշտպանի պարզաբանմամբ՝ խոսքը սնանկության վարույթում գտնվող մի քաղաքացու բնակարանի վեճն է, որի շրջանակում, նախքան Կուբանյանի կողմից վարույթ ընդունելը, մեկ այլ դատավորի որոշմամբ բնակարանն արդեն աճուրդի հանելու որոշում է կայացվել: Գրիգորյանի խոսքով՝ այն, ինչում մեղադրում են իր պաշտպանյալին, ոչ թե դատավորի, այլ սնանկության կառավարչի գործառույթների մեջ է մտնում.

«Ասում են՝ չի հետևել կառավարչին, որ նա հաշվետվություն ներկայացնի։ Իբր, եթե հաշվետվություններին հետևեր, կիմանար, որ բնակարանի արժեքը նույնն է մնում, չի իջնում, բայց այդ նույն բանը, աճուրդի հայտարարություն տալիս նշվել է։ Հետաքրքիրն այն է, որ սնանկության կառավարիչն էլ իր հերթին ցուցմունք է տվել՝ ասելով, որ զբաղվածության պատճառով չի կարողացել այդ հաշվետվությունը ներկայացնել»։

Օրեր առաջ դատավոր Աննա Մաթևոսյանը մերժեց Արա Կուբանյանի նկատմամբ խափանման միջոց կալանքն ընտրելու ԱԱԾ միջնորդությունը։ Ծառայությունը հիմքում դրել էր վարույթն իրականացնող մարմնից թաքնվելու և անձանց վրա հնարավոր ազդեցության ռիսկերը։ Մինչդեռ, ինչպես նշեց պաշտպանը, դատական նիստին արձանագրվել էր՝ եթե չկա Կուբանյանի դեմ ցուցմունք տված անձ, ու՞մ վրա պետք է ազդի․

«Սպասելի էր դատարանի կողմից մերժման մասին որոշումը, քանի որ նրան կալանավորելու հիմքեր առկա չէին»։

Հավելենք, որ նույն օրը մեղադրանք է առաջադրվել նաև Սնանկության դատարանի դատավոր Գևորգ Նարինյանին, սակայն դատարանը նրան երկու ամսով կալանավորելու որոշում կայացրեց։ Նարինյանին, սակայն, միանգամից չորս հոդված էր առաջադրվել։ Նկատենք, որ ի թիվս այլնի, դատավորին է մեղսագրվում նաև պաշտոնեական լիազորությունները չարաշահելուն օժանդակելու հոդվածը, որով այս պահին մեղադրվում է Կուբանյանը։

Հիշեցնենք, որ ՀՀ գլխավոր դատախազ Արթուր Դավթյանը հուլիսի 16-ին միջնորդություններ է ներկայացրել ՀՀ բարձրագույն դատական խորհրդին՝ վերջինիցս ստանալու համաձայնություն ՀՀ ԱԱԾ քննչական դեպարտամենտում քննվող քրեական գործի շրջանակներում 2 դատավորների նկատմամբ քրեական հետապնդում հարուցելու և նրանց ազատությունից զրկելու համաձայնություն ստանալու նպատակով:

Ժամեր անց ԲԴԽ-ն տվեց իր համաձայնությունը Կուբանյանի և Նարինյանի նկատմամբ քրեական հետապնդում հարուցելու վերաբերյալ: Հաջորդ օրը խորհուրդը կասեցրեց դատավորների լիազորությունները՝ մինչև նրանց նկատմամբ հարուցված քրեական վարույթների ավարտը։

Ռոզա Վարդանյան