«Հինգ վիրավորներից մեկի վիճակը ծայրահեղ ծանր է». Արծրուն Հովհաննիսյան

344

Առաջնագծում երեկ գնալով կրակոթցները քչացել են, իսկ գիշերը ժամը 00.15-ից սկսած լիարժեք դադար է տեղի ունեցել, չեն կիրառվել հատկապես մեծ տրամաչափի զենքեր, հրետանային զենքեր եւ այլն:

Այս մասին այսօր՝ հուլիսի 15-ին, լրագրողների հետ հանդիպմանն ասաց Իջեւանում լրատվական ճգնաժամային կենտրոնի պատասխանատու Արծրուն Հովհաննիսյանը:

«Մինչեւ այդ ժամը որոշակի ակտիվություն է եղել, որոշակի կրակոցներ: Մեր հակաօդային պաշտպանությունը խոցել է երկու ԱԹՍ, որոնք ընկել են միջդիրքային տարածքում:Այս պահի դրությամբ անդորրը շարունակվում է: Արցախյան հատվածում էլ է հանգիստ եղել, որեւէ արտառոց բան տեղի չի ունեցել»,-ասաց նա:

Հովհաննիսյանի խոսքով՝ ունեցել ենք ընդհանուր երկու տասնյակ վիրավորներ, նրանցից կեսը վերադարձել են ծառայության, իսկ բժշկական հաստատություններում է գտնվում 10-ը զինծառայող.

«Հինգ վիրավորներից մեկի վիճակը ծայրահեղ ծանր է»։

Արծրուն Հովհաննիսյանը ցավակցություններ հայտնեց երեկ հայկական կողմի 4 զոհերի ընտանիքներին:

«Երեկ նաեւ հակառակորդն է ամփոփել իր կորուստները: Չգիտեմ՝ դրանք վերջնական են թե, ոչ: Երեկ երեկոյան արդեն 12 անուն էր շրջանառվում՝ կորպուսի շտաբի պետ, կորպուսի հրետանու պետ, այլ սպաներ եւ նաեւ շարքայիններ»,-ընդգծեց նա: