Դեռևս անհայտ է՝ Ալեքսանդր Ազարյանի կարգապահական վարույթի քննությունը դռնբա՞ց է լինելու, թե՞ ոչ

Վերաքննիչ քրեական դատարանի դատավոր Ալեքսանդր Ազարյանին կարգապահական տույժի ենթարկելու մասին միջնորդությունը կքննվի հունիսի 18-ին։ Այս մասին Forrights-ը տեղեկանում է Բարձրագույն դատական խորհրդի որոշումից։

Այս պահին դեռևս անհայտ է՝ նիստը դռնբա՞ց է լինելու, թե՞ ոչ։ Օրեր առաջ, սակայն, դատավոր Ազարյանը Forrights-ի հետ զրույցում հայտնել էր, որ իր ցանկությամբ նիստը դռնբաց է լինելու՝ «որպեսզի բոլորի համար պարզ լինի իրականությունը»:

Դատավորի նկատմամբ կարգապահական վարույթ հարուցելու պատճառը «5-րդ ալիք» ՀԸ սեփականատեր Արմեն Թավադյանի խափանման միջոցի գործով դռնփակ դատական նիստում հնչեցված գնահատականն է:

Ալեքսանդր Ազարյանը, սակայն, հրաժարվեց որևէ դիրքորոշում հայտնել, այնինչ նրա ներկայացուցիչ Տիգրան Աթանեսյանը համոզված է՝ դատավորը պարզապես թիրախավորվել է իշխանությունների կողմից։

Հիշեցնենք, որ տեղեկությունների համաձայն, կարգապահական վարույթ հարուցելու վերաբերյալ հաղորդումն Արդարադատության նախարարություն է ներկայացրել ՀՔԾ կոռուպցիոն, կազմակերպված և պաշտոնեական հանցագործությունների քննության վարչության պետի տեղակալ Հրաչյա Մուշեղյանը։ Հենց նրա վարույթում են քննվել Քոչարյանի և Թավադյանի քրեական գործերը։

Ռոզա Վարդանյան