ճիշտ կլիներ՝ Բարձրագույն դատական խորհուրդն իր ողջ կազմով հրաժարական տար

983
Գագիկ Հարությունյան

Անկախ Հայաստանի գրեթե ողջ պատմության ընթացքում Սահմանադրական դատարանը ղեկավարած, իսկ վերջին մեկ տարում Բարձրագույն դատական խորհուրդը նախագահած Գագիկ Հարությունյանն այսօր հրաժարական տվեց:
Հարությունյանը գրել է, որ հրաժարական է տալիս «նկատի ունենալով դատական իշխանության և դատավորների առնչությամբ ընթացող զարգացումները»: Նա նաև խոստացավ Հայաստանի, Արցախի և Սփյուռքի հայրենակիցներին «տարիներով կուտակ» ասելիքը ներկայացնել հաջորդիվ:

«Վստահ եմ, որ այսուհետ բավարար ժամանակ կունենամ՝ հատկապես միջազգային մասնագիտական գործակցության շրջանակներում առավել ակտիվ գործունեություն ծավալելու համար՝ ի բարօրություն հայ ժողովրդի»,-խոստացավ Գագիկ Հարությունյանը:

ՀԺԿ փոխնախագահ Գրիգոր Հարությունյանը Forrights.am-ի հետ զրույցում ոչ դրական գնահատեց Գագիկ Հարությունյանը աշխատանքը հատկապես ՍԴ նախագահի պաշտոնում: «Գագիկ Հարությունյանի նախագահությամբ ՍԴ-ն Հայաստանի բոլոր ընտրություններում պաշտպանել է իշխանությանը՝ հաշվի չառնելով խախտումները: Բացի 1998 թ-ից, երբ Կարեն Դեմիրճյանը չբողոքարկեց, Հայաստանի ընտրությունների արդյունքները վիճարկվել են Սահմանադրական դատարանում ու իր նախագահած դատարանը որոշում է կայացրել ի օգուտ իշխանության՝ չնայած ակնհայտ կեղծիքներ»,-շեշտեց ՀԺԿ փոխնախագահը:

Նա առավել աբսուրդային համարեց 2003 թ ընտրությունների արդյունքներով ՍԴ որոշումը: «Ընտրախախտումների վերաբերյալ բավարար նյութեր էինք ներկայացրել ՍԴ, որ պարտավոր էին ընտրություններն անվավեր ճանաչել, բայց ՍԴ-ն ընդունեց որոշում, որ Ռոբերտ Քոչարյանը մեկ տարվա ընթացքում պետք է վստահության հանրաքվե անցկացնի ու հետամուտ չեղավ այդ որոշման իրագործմանը»,-հիշեցրեց Հարությունյանը՝ հավելելով. «Գագիկ Հարությունյանի դերակատարությունն այդպիսին է եղել»:

Նախկին դատավոր Պարգև Օհանյանը, մինչդեռ, մասնագիտական գիտելիքների առումով միայն դրական ու բարձր կարծիք ունի Գագիկ Հարությունյանի մասին: «Այլ հարց է, որ ցավոք, ինքը և ոչ միայն ինքը, գուցե նաև ես ժամանակին, ստիպված ենք եղել ինչ-ինչ օբյեկտիվ և սուբյեկտիվ պատճառներով պաշտպանել գործող իշխանության իրավունքները»,-ասաց նախկին դատավորը:

2008-ի մարտյան դեպքերից հետո ընտրությունների արդյունքները բողոքարկվեցին Սահմանադրական դատարանում և Պարգև Օհանյանը ՍԴ-ում Լևոն Տեր-Պետրոսյանի ներկայացուցիչներից էր: «Ակնհայտ էր, որ կային խախտումներ, որոնք իհարկե ազդել էին ընտրությունների արդյունքների վրա և ՍԴ-ն բավարար հիմքեր ուներ անվավեր ճանաչեր ընտրության արդյունքները»,-նշեց Պարգև Օհանյանը՝ հավելելով. «Բայց եղավ այն, ինչ եղավ: Այդ ժամանակ կային խոսակցություններ, որ ՍԴ վերևի հարկում զինվորներ կային, ինչը կարող էր ազդել ՍԴ որոշման վրա»:

Պարգև Օհանյանը, այնուամենայնիվ, կարծում է, որ Գագիկ Հարությունյանը կայացրել է Սահմանադրական դատարանը և դա չի կարելի անտեսել:

«Պարզվեց, որ Գագիկ Հարությունյանն այդպես էլ իր պատասխանատվությունը դատական համակարգի նկատմամբ անվստահության խնդրում չի տեսնում, ոչ անցյալի, ոչ ընթացիկ իրավիճակի շուրջ, նա հրաժարական է տվել՝ «Նկատի ունենալով դատական իշխանության և դատավորների առնչությամբ ընթացող զարգացումները և այդ առիթով մայիսի 20-ին մամուլով իմ կողմից արտահայտած մտահոգությունները» ձևակերպմամբ: Շատ ափսոս»-իր ֆեյսբուքյան էջում ափսոսանք է հայտնել ազգագրագետ Հրանուշ Խառատյանը:

Ըստ Խառատյանի՝ ճիշտ կլիներ՝ Բարձրագույն դատական խորհուրդն իր ողջ կազմով հրաժարական տար: «Տեսնենք՝ նրա հրաժարականով դատական համակարգում իրավիճակ կփոխվի՞, ինչում անձամբ ես կասկածում եմ, քանի դեռ ԲԴԽ-ն իր կազմով նույնն է մնում: Դա կախված կլինի նաև ԲԴԽ-ի նոր նախագահի անձից»,-գրել է Խառատյանը՝ շարունակելով. «Մեզ, իմ կարծիքով, խիստ անհրաժեշտ է իշխանության մյուս թևերից իսկապե՛ս անկախ, միայն օրենքի իրավունքով աշխատող դատական իշխանություն, որը կարողանա հակակշռել ընթացիկ ցանկացած իշխանության աչառություն»:

«Իմ քայլը» պատգամավոր Հերիքնազ Տիգրանյանը «Ազատության» հետ զրույցում կարծիք է հայտնել, որ Գագիկ Հարությունյանը չէր անցնի վեթինգը. «ԲԴԽ նախագահը պետք է առաջնահերթ նշանակվեր դատավորների ընդհանուր ժողովից առաջադրված անդամը, այնուհետև հերթը պիտի անցնել ԱԺ-ի թեկնածուին: Իսկ Գագիկ Հարությունյանը հենց ԱԺ-ի կողմից ընտրված ԲԴԽ անդամ է եղել: Սա կգնահատվեր որպես խախտում»:

Ուշագրավ է, որ Գագիկ Հարությունյանի հրաժարկանից հետո հրաժարական տվեց նաև նրա եղբայր, ԱԱԾ պետի տեղակալ, ԱԱԾ հնաբնակ Արզուման Հարությունյանը:

Մարինե Խառատյան