Տեղաբաշխման հանձնաժողովը մերժել է Դատախազության միջնորդությունը. դատապարտյալը կրկին բաց ռեժիմում է

0
455

Դատապարտյալ Հենրիխ Գրիգորյանի պատժի կրման ռեժիմը կրկին կդառնա բաց և կտեղափոխվի Մեղրիի Նռնաձոր գյուղ: Այս մասին Forrights-ին տեղեկացրեց Գրիգորյանի քույրը, հաստատեց նաև Քրեակատարողական ծառայությունը:

Երեկ Տեղաբաշխման հանձնաժողովը նիստ էր հրավիրել, որտեղ քննարկվել էր նաև Դատախազության միջնորդությունը, որով վերջինս հանձնաժողովից պահանջել էր կասեցնել դատապարտյալին բաց ռեժիմում պահելու որոշումը և կրկին վերադարձնել «Վարդաշեն» ՔԿՀ: Կասեցնելու միջնորդությունը մերժվել էր հանձնաժողովի կողմից, իսկ Հենրիխ Գրիգորյանը կրկին տեղափոխվել բաց ռեժիմ՝ Նռնաձոր:

Հիշեցնենք, որ օրեր առաջ Forrights-ին էր ահազանգել դատապարտյալ Հենրիխ Գրիգորյանի հարազատներից մեկը: 37-ամյա դատապարտյալ արդեն 12 տարի է, ինչ անազատության մեջ է գտնվում: «Վարդաշեն» ՔԿՀ-ում դրական վարքագիծ դրսևորած Գրիգորյանը 2018 թվականի դեկտեմբերի 27-ին տեղափոխվում է պատժի կրման բաց ռեժիմ՝ աշխատելու և ընտանիք կազմելու մտադրությամբ, սակայն ցանկությունը կիսատ է մնում: Մարտի 15-ին, առանց դատապարտյալին պատճառները բացատրելու, Դատախազությունը որոշում է կայացնում Գրիգորյանին կրկին տեղափոխել քրեակատարողական հիմնարկ և ռեժիմը խստացնել՝ դարձնելով կիսաբաց::

Խնդրին առավել մանրամասն ծանոթանալու համար, Forrights-ը կապ էր հաստատել Քրեակատարողական վարչության հետ, որտեղից մեզ հայտնել էին, որ Սյունիքի մարզի դատախազությունն է որոշում կայացրել դատապարտյալին բաց ռեժիմից տեղափոխել կիսաբաց ռեժիմ, իսկ Տեղաբաշխման հանձնաժողովից պահանջել վերանայել որոշումը:

Ըստ Դատախազության, Գրիգորյանը 5 կարգապահական խախտում էր կատարել, այն է՝ հեռախոս է պահել: Փաստացի, դատապարտյալի պատժի կրման ռեժիմը փոխվել էր, շուրջ 3 ամիս անցկացրել բաց ռեժիմում և միայն այժմ էր «հայտնաբերվել», որ Հենրիխ Գրիգորյանն ունի 5 կարգապահական տույժ:

Հատկանշական էր, որ ի հակադրություն Դատախազության պարզաբանման բովանդակության, դատապարտյալի վարքագծի վերաբերյալ դրական բնութագիր էր տվել ինչպես «Վարդաշեն» ՔԿՀ-ն, այնպես էլ Նռնաձորի գյուղապետը: Քրեակատարողական ծառայությունը ևս նույնակարծիք էր՝ Գրիգորյանը լավագույն դատապարտյալներից է:

Ռոզա Վարդանյան

ԹՈՂՆԵԼ ՊԱՏԱՍԽԱՆ

Please enter your comment!
Please enter your name here