«Տպավորություն է եղել, որ եթե չասեմ իրենց ուզածը, կձերբակալեն»․ «Սասնա Ծռեր»-ի գործով ցուցմունք տրվեց

1089

Երևան քաղաքի ընդհանուր իրավասության առաջին ատյանի դատարանի Շենգավիթի նստավայրում այսօր շարունակվեց «Սանա Ծռեր 2» քրեական գործի քննությունը։ Նիստը սկսվեց խմբավորման աջակիցների ակցիայով․ վերջիններս իրենց ձեռքում էին պահել Սմբատ Բարսսեղյանի և Արմենե Բիլյանի լուսանկարները և պահանջում էին ազատ արձակել նրանց։

Այսօրվա նիստին ներկայացել էին այս գործից անջատված մասով մեղադրյալներ Կարեն Հակոբյանը, ով «Սասնա Ծռեր» խմբավորման անդամ Մարտիրոս Հակոբյանի որդին էր, և Վահե Պետրոսյանը։ Նրանք հրաժարվեցին դատարանում ցուցմունք տալ, ինչի պատճառով էլ դատարանը հրապարակեց մեղադրյալներ Հակոբյանի և Պետրոսյանի նախաքննակաան ցուցմունքները։

Կարեն Հակոբյանը դատարանին հայտնեց, որ «Սասնա Ծռեր» խմբավորման կազմում և ՊՊԾ գնդում հայտնվել է հոր՝ Մարտիրոս Հակոբյանի միջոցով։

«Հայրս ասաց, որ ամեն գնով պիտի երկրում հեղաշրջում կատարվի, Սեֆիլյանը բանտում ա, սակայն  շարժումը կգլխավորի Վարուժան Ավետիսյանը: Հետո հարցրեց՝ կա՞ն արդյոք հավատարիմ մարդիկ, ովքեր կարող են միանալ շարժմանը: Հայրս տեղեկացրել ա, որ շարժմանը մասնակցելու ա նաև Պավլիկ Մանուկյանը: ՊՊԾ գնդի գրավումից մեկ օր առաջ հայրս զանգեց ու կանչեց  ինձ: Ինձ միացան նաև ընկերներս Վահե պետրոսյանը և Արայիկ Հակոբյանը։ Հայրս անգամ չի մասնակցել սեփական մոր թաղմանը Քաշաթաղում, քանի որ ասել ա՝ կարևոր գործեր կան, հեղաշրջում կատարելուց հետո բոլորով կգնան տատի գերեզմանին»,- իր ցուցմունքում նշել էր Հակոբյանը։

Նախաքննական ցուցունքներից հետո մեղադրյալ Կարեն Հակոբյանը հայտարարեց, որ հրաժարվում է իր ցուցմունքներից, քանի որ դրանք գրվել են հոգեբանական ճնշման տակ։ Ըստ նրա, իրեն առևանգել են, արգելել զանգել հարազատներին և փաստաբանին, ապա անընդմեջ հարցեր տվել, ինչն էլ ճնշել է իրեն։

«Առաջին անգամ էի զինված «մասկեքով» մարդկանց տեսնում: Մեքենայով կտրեցին դիմացս, կարելի է ասել՝ ելան վրաս, հետո ձերբակալեցին ու տարան: Մոտ 7 ժամ մեկուսացված եմ եղել։ Մի խոսքով, ասել եմ այն, ինչ նրանց դուրը կգար»։

Անդրադառնալով ՊՊԾ գնդում զոհված ոստիկաններից Գագիկ Մկրտչյանի մասին իր ցուցմունքին, հայտարարեց, որ ասվածը չի համապատասխանում իրականությանը:

«Ես ուզում եմ արդար լինել: Ես նրան տեսել եմ ձեռքից վիրավորված, մինչդեռ հետո իրավապահներն ասացին, որ երիկամների հրազենային վնասվածքից է հիվանդանոցում մահացել։ Չեմ կարծում, որ երիկամների վնասվածք ունենալով՝ նա կարող էր ազատ շարժվել: Իսկ ես տեսել եմ միայն նրա վիրավոր ձեռքը, նա ազատ շարժվում էր ու քայլում»: 

Նույնաբովանդակ նախաքննական ցուցմունք էր տվել նաև Վահե Պետրոսյանը։ Նա դատարանում միանգամից հայտարարեց, որ հրաժարվում է նախաքննական ցուցմունքներից և այն ամբողջությամբ սուտ է։ Դատարանը հրապարակեց նրա նախաքննական ցուցմունքները, ըստ որի, Հակոբյանը քաղաքականությամբ երբեք չի հետաքրքրվել, սակայն Կարեն Հակոբյանի հորդորով մասնակցել է  Ժիրայր Սեֆիլյանի պաշտպանության համար կազմակերպված ցույցին: Կարենը նրան ասել է, որ «մարդաքանակ է  հարկավոր»:

Ըստ ցուցմունքի, գիշերվա ժամը 02։00-ին, նրանց է մոտեցել մարդատար մեքենա, որի նստատեղերը հանված են եղել և հատակին մոտ երեք-չորս տղամարդ է նստած եղել, մոտեցել են մի շինության: Եղել են նաև այլ մեքենաներ, որոնցից իջել են զինված մարդիկ: Վահեն նկատել է, որ դա ցույցի գնալու նման չէ, ասել է՝ ուզում է իջնել և հեռանալ: Մեքենան մտել է մի տարածք, որը հետագայում է հասկացել՝ ոստիկանական գունդ է: Վահեն պառկել է գետնին, քանի որ անդադար կրակել են, տեսել է, որ «մեշոկներով» զենքեր են բերվել, որոնք բաժանվել են բոլորին, նկատել է  նաև ձեռքից վիրավոր ոստիկանին, որին մեկ այլ ոստիկան ուղեկցել է դեպի շտապօգնության մեքենա:

Մեքենան հեռու է  կանգնած եղել: Գունդը գրավածներն արգելել են մեքենային շատ մոտենալ: Քիչ անց նկատել է, որ գունդը գրավածները հրմշտելով բերել են մի քանի ոստիկանի, նրանց թվում՝ Վալերիյ Օսիպյանին:

«Աշոտը պոկեց Օսիպյանի համազգեստի ուսադիրները: Օսիպյանից պահանջում էին, որ ոստիկաններին ասի՝ ազատեն տարածքը: Նրան հարվածեցին ու ասացին, որ նրա դեմ ոչինչ  չունեն, բայց պահանջում են, որ Սեֆիլյանն ազատվի: Ես հարցրի Կարենին՝ մի՞թե իմ հայրը քո նկատմամբ էդպիսի բան կաներ, մի՞թե հնարավոր է  հեղափոխություն անել մի քանի  հոգով»,- իր ցուցմունքում նշել էր Պետրոսյանը։

Նախաքննական ցուցմունքները հրապարակելուց հետո Վահե Պետրոսյանը հրաժարվեց պատասխանել որևէ հարցի, փոխարենը ասաց, որ նախաքննական մարմնում հարցաքննելիս իրեն հարցեր շատ չեն տրվել, եղել է թելադրանք․

«Տպավորություն է եղել, որ եթե չասեմ իրենց ուզածը, կձերբակալեն, եթե ասեմ՝ բաց կթողնեն»։

Կարեն Հակոբյանը և Վահե Պետրոսյանը ՊՊԾ գունդը լքել են իրենց մուտք գործելուց օրեր անց։ Նրանք նկատել են ավտոտնակի ու պատի միջև առկա բաց տարածքը, բարձրացել պատի վրա ու փախել:

Ի դեպ, հատկանշական է, որ այս երկու մեղադրյալներին օրեր առաջ, մինչև այսօրվա նիստին ներկայանալը, հրավիրել են Հատուկ քննչական ծառայություն։ Ըստ Հակոբյանի և Պետրոսյանի այնտեղ որևէ խոսք չի եղել ցուցմունքների մասին, սակայն իրենց տարօրինակ է թվացել ՀՔԾ-ի կանչը։

Դատարանը Կարեն Հակոբյանի և Վահե Պետրոսսյանի հարցաքննությունն ավարտված համարեց։