«Եթե վնասվածքը հասցրել է Արմեն Բիլյանը, ուրեմն թող մինչև վերջ նստի ու պատասխան տա արարքի համար»

1142

Երևան քաղաքի ընդհանուր իրավասության դատարանի Շենգավիթի նստավայրում դատավոր Մեսրոպ Մակյանը քիչ առաջ որոշում կայացրեց մերժել պաշտպան Զարուհի Փոստանջյանի միջնորդությունը. պաշտպանը միջնորդել էր փոխել Արմեն Բիլյանի խափանման միջոց կալանքը և այն փոխարինել ստորագրություն երկրից չհեռանալու մասին։

«Այսօր մենք ականատես եղանք, որ գործից անջատված մասով անցնող մեղադրյալներն էլ փաստեցին, որ չեն տեսել, թե ով է կրակել ոստիկանների ուղղությամբ։ Ավելին, նրանք չեն տեսել, որ իմ պաշտպանյալ Արմեն Բիլյանը կրակի որևէ մեկին։ Ուստի արդարացի կլինի, որ նրա խափանման միջոց կալանքը փոխվի»,- իր միջնորդության հիմքում նշեց Փոստանջյանը։

Արմեն Բիլյանը միացավ ներկայացված միջնորդությանը և հայտարարեց. «Իմ խիղճը մաքուր ա»։

Մեղադրող դատախազ Պետրոս Պետրոսյանն առարկեց ներկայացված միջնորդության դեմ, նշելով՝ այն անհիմն է և ենթակա է մերժման, քանի որ դեռ առկա է վտանգ, որ ամբաստանյալը, գտնվելով ազատության մեջ կխուսափի դատարան ներկայանալուց։

«Արմեն Բիլյանը փախնող տղա չի, իր հայրենիքը լքող չի։ Արմեն Բիլյանը մինչև վերջին շունչը պայքարող տղա ա»,- դատախազի խոսքին տեղից միջամտեց Բիլյանը։

Տուժողի իրավահաջորդ Հասմիկ Ոսկանյանը՝ սպանված ոստիկան Գագիկ Մկրտչյանի կինը, ևս առարկեց։ Նա նշեց, որ ազգի համար մտածող մարդը չի գնա և բանկոմատ թալանի․

«Ազգի համար գնացող մեկը բանկոմա՞տ է թալանում: Հանուն հայրենիքի մարդը չի գնում մանր գողության: Ինձ հետաքրքիր չի` վնասվածքը եղել է իր կողմից, թե մեկ ուրիշի: Գագիկ Մկրտչյանը վիրավոր է եղել 27 օր ապրել է, որից 12 օրը գիտակցության մեջ է եղել: Ես խոսել եմ Գագիկի հետ, նա ասել է` ինչպես է վնասվածք ստացել։ Եթե վնասվածքը հասցրել է նա, ուրեմն թող մինչև վերջ նստի ու պատասխան տա արարքի համար: Թող դատարանը որոշի:  Շատերը ոչինչ չգիտեն և ռեպլիկներ են թողնում»,- հայտարարեց տիկին Ոսկանյանը։

Դահլիճում գտնվող «Սասնա Ծռեր» խմբավորման համակիրները՝ ի նշան բողոքի, սկսեցին բղավել և աղմկել տուժողի կնոջ խոսքի ընթացքում, ինչը հուզեց Հասմիկ Ոսկանյանին

Շուրջ րոպե խորհրդակցական սենյակում անցկացնելուց հետո, դատավոր Մեսրոպ Մակյանը որոշեց միջնորդությունը մերժել և ավարտված համարել այսօրվա դատական նիստը։ Քրեական գործի քննոթյունը կշարունակվի հունվարի 23-ին։