Զինծառայող Վանիկ Գևորգյանի մահվան գործով մեղադրանք է առաջադրվել համածառայակցին. ՔԿ

Ժամկետային զինծառայող Վանիկ Գեւորգյանի մահվան գործով կա մեղադրյալ։

NEWS.am–ի հետ զրույցում Քննչական կոմիտեի նախագահի խորհրդական Սոնա Տռուզյանը հայտնեց, որ երկրորդ կայազորային քննչական բաժնում ձեռնարկվում են անհրաժեշտ քննչական գործողություններ՝ պարտադիր ժամկետային զինծառայող, շարքային Վանիկ Գևորգյանի մահվան բոլոր հանգամանքները պարզելու ուղղությամբ։

«Զինծառայողի դին հայտնաբերվել է 02.09.2018թ., ժամը 20:55-ի սահմաններում՝ N զորամասի 2-րդ հրետանային դիվիզիոնի նախկին զորանոցի չշահագործվող շենքում քողով /պարանով/ կախված վիճակում:

Դեպքի առթիվ երկրորդ կայազորային քննչական բաժնում հարուցվել է քրեական գործ, որի շրջանակներում իրականացված բազմակողմանի քննության արդյունքում տվյալներ են ձեռք բերվել նույն զորամասի մեկ այլ ժամկետային ծառայողի կողմից կանոնագրքային հարաբերությունները խախտելու, տուժողի նկատմամբ բռնություն գործադրելու վերաբերյալ։

Ձեռք բերված ապացույցների հիման վրա՝ համածառայակցին մեղադրանք է առաջադրվել ՀՀ քրեական օրենսգրքի 359-րդ հոդվածի 3-րդ մասով՝ ծառայողների փոխհարաբերությունների կանոնագրքային կանոնները խախտելը, որն անզգուշությամբ առաջացրել է ծանր հետեւանքներ։ Նրա նկատմամբ որպես խափանման միջոց է կիրառվել կալանավորումը»,– ասաց Սոնա Տռուզյանը: