Սարիգյուղում բան է փոխվել. կանայք առաջադրվել են գյուղի ավագանիում

0
202

Սեպտեմբերի 29-ին տեղական ինքնակառավարման մարմինների ընտրություններ կանցկացվեն Հայաստանի 19 համայնքներում: Նոր գյուղապետեր ու ավագանիներ կընտրվեն Արագածոտնի, Արմավիրի, Արարատի, Գեղարքունիքի, Շիրակի, Լոռու ու Տավուշի մարզերում:

Տավուշի մարզի Սարիգյուղ համայնքում առաջին անգամ գյուղի ավագանու ընրություններում կպայքարեն նաև կին թեկնածուներ, որոնց աջակցում է

«ՕքսԵՋեն» հիմանդրամի «Կանայք քաղաքականության մեջ» ծրագիրը՝ օգնելով նախընտրական ծրագիր կազմել և կազմակերպել քարոզարշավը: Օրերս Դիլիջանում ծրագրի շրջանակում կազմակերպված սեմինարի ժամանակ հնարավորություն ունեցանք հանդիպելու ու հարցեր ուղղելու կին թեկնածուներից երկուսին:

Սահմանամերձ Սարիգյուղում ավագանու 5 տեղի համար պայքարում են 11 թեկնածուներ, որոնցից  3-ը կանայք են: Տավուշի մարզի Սարիգյուղ համայնքի 44-ամյա բնակիչ Լուիզա Ռևազյանը, որը նաև գյուղի դպրոցի տնօրենն է, Թավշյա հեղափոխությունից հետո է որոշել մասնակցել ընտրություններին ու առաջադրվել: «Մտածեցի, որ երկրում բան է փոխվել, դեպի լավը հույսեր, գաղափարներ կան, ու ոնց որ ես էլ ինքս ինձ համոզեցի, որ մեր սկսած գործը պիտի անավարտ չթողնենք, որոշեցի դառնալ ավագանու թեկնածու»,-պատմեց նա՝ հավելելով. «Սա եզակի դեպք է մեր համայնքում, որ թեկնածուներից 3-ը կին ենք»:

Մեզ հետ հանդիպած գյուղի ավագանու մյուս կին թեկնածու Օֆելյա Ռևազյանը Իջևանի զինկոմիսարիատում հաշվառման գծով տեսուչ է աշխատում: Նա նաև Արցախյան պատերազմում զոհված Համլետ Աթաբեկյանի այրին է, ում անունով է վերջերս անվանակոչվել Սարիգյուղի դպրոցը: «Հարևաններս, զոհվածի այրիները համոզեցին, որ իրենց խնդիրները բարձրացնեմ: Հարցեր կար հարևանության մեջ: Կան հարցեր, որոնք տղամարդիկ ուրիշ ձև են նայում»,-պատմեց նա:

Կին թեկնածուն գյուղապետարանում առաջնահերթ բարձրացնելու է գյուղի երեխաների համար սպորտային ու մշակութային խմբակների ստեղծման հարցը: «Գյուղ ա, բայց իրենք էլ են ուզում իրենց երեխաները ամեն ինչից օգտվեն: Գյուղի երեխեն շատ ա խեղճ մնում: Ո՞վ կարա երեխուն տանի Իջևան ամեն անգամ, 18 կմ է: Հազվագյուտ ծնողներ են կարողանում երեխաներին քաղաք տանել՝ խմբակների մասնակցելու համար»,-գյուղացիների հոգսից կիսվեց ավագանու թեկնածուն:

Մյուս թեկնածուն՝ Լուիզա Ռևազյանն էլ հավելեց, որ պատճառը ոչ միայն ֆինանսական է, այլև կազմակերպչական: Բացի դա, Սարիգյուղը չունի մշակույթի տուն: «Մասամբ կրակոցներից, մասամբ անձրևներից ավերվել է ու մեր երեխաները մշակույթից դուրս են մնում»,-դժգոհեց նա՝ հավելելով, որ ընտրվելու դեպքում բարձրացնելու է նաև գյուղի ուսանողների տրանսպորտի խնդիրը, ինչից զրկված են գյուղի երիտասարդները:

Գյուղի կանայք նաև մի շարք այլ խնդիրներ են գրանցել, որոնց լուծումները պատրաստվում են որոնել ավագանիում:

Ասում են՝ ավագանու տղամարդ թեկնածուները իրենց խեթ չեն նայում, թե կնիկն ինչ գործ ունի գյուղը կառավարելու հարցում, հակառակը, օգնել են գրանցվելու համար Նոյեմբերյան գնալ:

Մարինե Խառատյան

ԹՈՂՆԵԼ ՊԱՏԱՍԽԱՆ

Please enter your comment!
Please enter your name here