«Կալանավայրերը պետք է ազատել, մոտ 80 տոկոսով: Այնտեղ պետք է թողնել միայն ամենավտանգավոր հանցագործներին»

854

Քաղաքագիտության դոկտոր, հրապարակախոս Արկադի Վարդանյանը Սերժ Սարգսյանի ժամանակների քաղբանտարկյալներից է, որը 2013 թվականին դատապարտվեց անհեթեթ մեղադրանքով՝ ընկերոջ հորը թունավորելու համար, իսկ 2018 թվականի նոյեմբերին համաներումով ազատ արձակվեց: 4 տարի քաղաքագետը եղել է «Արմավիր» քրեակատարողական հիմնարկի բնակիչ, իսկ ազատվելուց առաջ մոտ մեկ ամիս անցկացրել է «Վարդաշեն» քրեակատարողական հիմնարկում: Այդ ընթացքում նա մանրամասն ուսումնասիրել է բանտային պայմանները և եկել է համոզման, որ Հայաստանիքրեակատարողական հիմնարկներում հակասանիտարական վիճակ է տիրում, որը նպաստավոր պայմաններ է ստեղծում կորոնավիրուսի տարածման համար: 

Արկադի Վարդանյանը առաջարկում է Նիկոլ Փաշինյանին համաներում հայտարարել: «Կալանավայրերը պետք է ազատել, մոտ 80 տոկոսով: Այնտեղ պետք է թողնել միայն ամենավտանգավոր հանցագործներին, որոնք որ պետության, ազգի դեմ են հանցագործություններ կատարել, և նրանց կենտրոնացնել մեկ կալանավայրում Սա շոշափելի քայլ կլինի», — ասում է Վարդանյանը: Այս առաջարկը նա մի անգամ էլ է հնչեցրել, սակայն ոչ մի արձագանք չի ստացել իշխանությունից:

Forrights.am-ը մի քանի հարց ուղղեց քաղաքագետին: — Այսօր աշխարհի տարբեր երկրներում դատապարտյալներին ազատ արձակելու որոշումներ են ընդունվում: Չե՞ք կարծում, որ եթե մեզ մոտ նման միջոցներ ձեռնարկեն, ասենք, ազատ արձակեն թեթև գողություններ արածներին, հանցավորությունը կտրուկ աճ կապրի: 

-Հիմա մենք հայտնվել ենք այնպիսի իրավիճակում, որ հանցագործությունների ավելացման մասին մտածելու ժամանակը չի: Մեզ ավելի լուրջ վտանգ է սպառնում: Դրա մասին պետք է մտածել, առաջնային հարցերը պետք է կարգավորել, և ընդհանրապես, կյանքը կարգավորել: Եթե կյանքը կարգավորված է լինում, հանցագործություները պակասում են: Հանցագործությունները ինչի՞ց են լինում: Պակասից, ղքատությունից, չէ՞: Մարդիկ հենց այնպես, սպորտային  հետաքրքրություն չեն գնում, գողություն անում, չէ՞:

 — Դուք 2018 թվականին ազատվեցիք, դուք ասում եք, որ «Արմավիր» ՔԿՀ-ում հակասանիտարական պայմաններ են, իսկ հնարավոր չե՞ք համարում, որ վերջին երկու տարում այնտեղ փոփոխություններ եղած լինեն, 2 տարի անցել է:

— Դժվար թե:

 — Իսկ ի՞նչն է առավել վտանգավոր:

— Օրինակ, օդափոխության համակարգ «Արմավիր» ՔԿՀ-ում չկա: Մինչդեռ «Արմավիրը» նորակառույց կալանավայր է: Շինարարության ընթացքում՝ մեզանում ձևավորված չար ավանդույթի համաձայն փողի կեսը գողացել են: Չ՞է, որ գումարը Եվրոպան է հատկացրել: Ոչ կարգին ֆունդամենտ են կառուցել, ոչ օդափոխման համակարգ են տեղադրել: Այդ է պատճառը, որ «Արմավիր» ՔԿՀ-ում հակասանիտարական իրավիճակ է տիրում:  — Իսկ բժշկական պարագներ ու միջոցները, խոհանոցային սպասք, նորացվու՞մ են: — Ոչ, նման բան գոյություն չունի: Բոլորը հին են:

 — Հիմա ձեզ եթե Նիկոլ Փաշինյանը զանգեր, նրան ի՞նչ կասեիք:

— Նա ինձ երբեք չի համարձակվի զանգել: Դա՝ մեկ: Երկրորդը՝ քաղաքացիներին զանգելը էժան պոպուլիզմ է: Ինքը չգիտ՞ի, որ երկրում 700 հազար հոգի ապրում են աղքատության մեջ: 700 հազար բնակիչ աղքատ ունենք:

Հ.Գ. Մենք դիմեցինք արդարադատության նախարարության մամուլի ծառայություն, խնդրելով պատասխանել, թե արդյո՞ք նախարարությունը չի՞ պատրաստվում  միջոցներ ձեռնարկել կալանավայրերը կորոնավիրուսից պաշտպանելու, դրանք բեռնաթափելու ուղղությամբ: Մանավանդ, որ այս մասին հայտարարություն է տարածել ՄԱԿ-ի մարդու իրավունքնեների բարձրագույն հանձնակատար Միշել Բաչելետը և շատ երկրներում բանտերը բեռնաթափելու որոշումներ են ընդունում:

Մամուլի քարտուղար Լուսինե Մարտիրոսյանը հայտնեց, որ նախարարությունը իրավասու չէ այս հարցին պատասխանելու և խորհուրդ տվեց կապվել պարետատան հետ: Սակայն պարետատնից մեր բազմաթիվ զանգերին չպատասխանեցին:

Սյուզան Սիմոնյան