լ ր ա գ ր ո ղ ն ե ր   հ ա ն ու ն   մ ա ր դ ու   ի ր ա վ ու ն ք ն ե ր ի
ի ր ա վ ա կ ա ն    լ ր ա տ վ ա կ ա ն   կ ա յ ք
12.06.2018 | բանակ

Կուրսանտի սպանության մեջ մեղադրվող Նորիկ Սահակյանը հրաժարվեց ցուցմունք տալ

Կուրսանտի սպանության մեջ մեղադրվող Նորիկ Սահակյանը հրաժարվեց  ցուցմունք տալ
2015թ. հունվարի 28-ի լույս 29-ի գիշերը Վազգեն Սարգսյան ռազմական ինստիտուտի կուրսանտ՝ 19-ամյա Հայկազ Բարսեղյանի առանձնակի դաժանությամբ սպանության մեջ մեղադրվող 22-ամյա Նորիկ Սահակյանն այսօր դատարանում հրաժարվեց ցուցմունք տալուց: Վերջինս դատարանին հայտարարեց, որ չի պատրաստվում պատասխանել դատավարական կողմերից և ոչ մեկի, այդ թվում և իր պաշտպանի՝ Հովիկ Արսենյանի հարցերին:  

Երևան քաղաքի ընդհանուր իրավասության առաջին ատյանի դատարանի Ավան և Նոր Նորք նստավայրում այսօր շարունակվող նիստի ժամանակ, ամբաստանյալ Սահակյանի նմանօրինակ խոսքից հետո, դատավոր Դավիթ Հարությունյանը հայտարարեց, որ հրապարակվում են Նորիկ Սահակյանի նախաքննական ցուցմունքները: Ինչպես գործով անցնող մյուս ամբաստանյալ Գնել Թևոսյանը, Սակահյանը նույնպես չի ընդունել իրեն առաջադրված մեղադրանքը, նշելով, որ միայն առավոտյան է իմացել Հայկազի հետ կատարված դեպքի մասին. 

«Դեպքի նախորդ օրը՝ հունվարի 28-ին, ես ու մի քանի կուրսանտներ գնացել ենք զորամասի մոտ գտնվող եկեղեցին, իսկ երեկոյան՝ անվանականչից և «Քո՛ւն» հրամանից քիչ հետո, պառկել եմ քնելու: Առավոտյան արթնանացել եմ ժամը 07:30-ի սահմաններում՝ «Վե՛ր կաց» հրամանից հետո ու միայն այդ ժամանակ՝ տղաների հետ միասին, իմացել եղելության մասին: Ես որևէ կապ չունեմ այդ սպանության հետ»,- իր ցուցմունքներից մեկում հայտարարել էր Սահակյանը: 

Քննիչի այն հարցին, թե այդ դեպքում ինչո՞վ կբացատրի այն հանգամանքը, որ կեսգիշերից հետո, ինքն այնուամենայնիվ քնած չի եղել և գտնվել է ննջասենյակից դուրս, Սահակյանը շեշտել էր. «Իմ խնդրանքով մեր սպաներից մեկը՝ Թելման Մխիթարյանը, ինձ արթնացրել էր, որ դաս սովորեի: Ես 2 կուրսանտների հետ դաս եմ սովորել, ընթացքում սուրճ խմել, ապա՝ որոշ ժամանակ անց, գնացել քնելու»,- քննիչին ի պատասխան ասել էր Սահակյանը: Քննիչի այն նկատառմանը, թե այդ պարագայում ինչպե՞ս է նրա մեզի մեջ ալկոհոլի չափաբաժին հայտնաբերվել, Սահակյանը հերքել էր, պահանջելով կրկնակի փորձաքննություն իրականացնել: 

Հրապարակվեց նաև Նորիկ Սահակյանի և գործով անցնող վկաների առերեսման արձանագրությունները: Վերջիններս հստակ նշում էին, որ սպանության գիշերը լսելի է եղել նաև Սահակյանի ձայնը, սակայն ամբաստանյալն այս փաստը ևս հերքում է և շեշտում. «Իմ դեմ ցուցմունք տվողների խոսքերն իրականությանը չեն համապատասխանում: Ես անմեղ եմ, սպանության հետ կապ չունեմ»,- ցուցմունքներում կրկնում էր Սահակյանը: 

Նախաքննական ցուցմունքի հրապարակումից հետո, մեղադրող կողմը մի շարք հարցեր ուղղեց Սահակյանին, սակայն, վերջինս հրաժարվեց դրանց պատասխանել: Տուժողի իրավահաջորդի ներկայացուցիչ Անի Թորոսյանն ամբաստանյալից փորձեց ճշտել՝ արդյո՞ք վերջինս չի ցանկանում նշել գոնե մեկ փաստարկ, որով կհամոզի, որ ինքը Հայկազ Բարսեղյանի սպանության հետ որևէ կապ չունի: Սահակյանը կրկին հրաժարվեց.  «Ոչ մի հարցի չեմ պատասխանելու»,- հայտարարեց նա:  Ավարտված համարելով Նորիկ Սահակյանի հարցաքննությունը, դատավոր Հարությունյանը ցուցմունք տալու հրավիրեց Վարազդատ Սաֆարյանը: Ինչպես Սահակյանը, Սաֆարյանը նույնպես հրաժարվեց ցուցմունք տալուց: 

Հիշեցնենք, որ վերջինս այս սպանության գործով չի անցնում, այլ մեղադրվում է կանոնադրային հարաբերություններ խախտելու մեջ: Մասավորապես, ըստ մեղադրանքի, Վարազդատ Սաֆարյանը Հայկազ Բարսեղանի սպանության գործով մեղադրյալներ Վաչե Սահակյանի և Մովսես Ազարյանի հետ երկու կուրսանտի՝ Տիգրան Մանասարյանին և Արտուշ Սիմոնյանին ծեծի է ենթարկել:   

Վարազդատ Սաֆարյանը նախաքննության ընթացքում չի ընդունել իրեն առաջադրված մեղադրանքը, սակայն մատնանշել է. «Այո՛, Վաչե Սահակյանի և Մովսես Ազարյանի հետ հացկերույթի մասնակցել եմ, օգտագործել եմ նաև ալկոհոլ, սակայն որևէ մեկի ծեծի չեմ ենթարկել»,- հայտարարել էր Սաֆարյանը: Վերջինս այս գործով հարցաքննվել էր նախ որպես վկա, ապա, որոշ ժամանակ անց, դարձել ամբաստանյալ: Գնել Թևոսյանի և Վաչե Սահակյանի պաշտպան Արա Զաքարյանը, դատարանին հայտարարեց, որ նախաքննության ընթացքում խախտվել են Սաֆարյանի իրավունքները. 

«Սաֆարյանն առաջին անգամ հարցաքննվելիս վկայի  կարգավիճակ է ունեցել, սակայն քննիչը նրան ակհայտորեն մեղադրական ուղղվածությամբ հարցեր է տվել: Նման իրավիճակում քննիչը պետք է ընդհատեր հարցաքննությունը, նրան կասկածյալի դատավարական կարգավիճակ տար, բացատրեր կասկածյալի իրավունքների և պարտականությունների մասին, որից հետո միայն նրան հարցաքննել կասկածյալի կարգավիճակով»,- իր խոսքում նշեց պաշտպան Զաքարյանը:  

Մեղադրող Կարեն Հարությունյանն էլ իր հերթին հակադարձեց պաշտպանին, փաստելով, որ վկայի հարցաքննության ընթացքում պահպանվել է Սաֆարյանի՝ վկայի կարգավիճակում ունեցած իրավունքները: Գործով անցնող մյուս ամբաստանյալներ Վաչե Սահակյանը և Մովսես Ազարյանն այսօր հրաժարվեցին հարցաքննությունից, նշելով, որ առողջական խնդիրներ ունեն: Դատավոր Հարությունյանը բավարարեց նրանց միջնորդությունը և նիստը հետաձգեց մինչև հունիսի 18-ը:  

Հիշեցնենք, որ 2015թ. հունվարի 29-ի առավոտյան, Վազգեն Սարգսյան ռազմական ինստիտուտի բակում՝ պտտաձողի վրա կախված վիճակում հայտնաբերվել է 19-ամյա Հայկազ Բարսեղյանի դին: Ըստ մեղադրանքի, նրան դաժանորեն սպանել են նույն ինստիտուտի 4 երիտասարդները, ապա կտրել երակները, ինչից հետո ինքնասպանության տպավորություն ստեղծելու միտումով, կախել շարահրապարակի պտտաձողից:    

Ռոզա Վարդանյան               
625
Print
բանակ
Ռոբերտ Քոչարյանն ազատ արձակվեց. 13.08.2018 | բանակ

Ռոբերտ Քոչարյանն ազատ արձակվեց.

ՀՀ երկրորդ նախագահ Ռոբերտ Քոչարյանը քիչ առաջ ազատ արձակվեց. Վերաքննիչ քրեական դատարանը հիմք ընդունելով նրա անձեռնալխելիությունը, փոխեց Քոչարյանի խափանման միջոց կալանքը։    

«Չի կարող անձը ենթարկվել պատասխանատվության

Վարչապետի որդին զինվորական երդում տալիս 13.08.2018 | բանակ

Վարչապետի որդին զինվորական երդում տալիս

Վարչապետ Նիկոլ Փաշինյանը հրապարակել է իր որդու՝ Աշոտ Փաշինյանի լուսանկարը, ով այսօր զինվորական երդում է տվել: 

«Որդիս՝ զինվորական երդում տալիս», – գրել է Փաշինյանը՝ Ֆեյսբուքի իր էջում տեղադրելով որդու լուսանկարը:
Շարունակում են բանակ զորակոչել առողջական խնդիրներ ունեցող երիտասարդներին 9.08.2018 | բանակ

Շարունակում են բանակ զորակոչել առողջական խնդիրներ ունեցող երիտասարդներին

Զինակոչիկների հիվանդությունների ախտորոշումը դեռևս պատշաճ մակարդակի վրա չէ: Այդ մասին է վկայում քաղաքացի Վաղարշակ Տոնապետյանի երկու որդիների պատմությունը: Նրա երկու որդիներն էլ բանակ զորակոչվելիս առողջական խնդիրներ են ունեցել, ինչին ՊՆ ռազմաբժշկական հանձնաժողովը պատշաճ ուշադրություն չի դա

լրագրողներ հանուն մարդու իրավունքների | 530840 ; 093589631 | info@jfhr.am Մեջբերումներ անելիս հղումը «JFHR»-ին պարտադիր է:© 2013 JFHR online: Բոլոր իրավունքները պաշտպանված են:

Այս կայքը ստեղծվել է «Լրատվության այլընտրանքային ռեսուրսներ» ծրագրի շրջանակներում: Ծրագիրը հնարավոր է դարձել Ամերիկայի ժողովրդի աջակցությամբ` ԱՄՆ Միջազգային զարգացման գործակալության /ԱՄՆ ՄԶԳ/ միջոցով:Կայքի բովանդակությունը միմիայն հեղինակներինն է և պարտադիր չէ, որ արտահայտի ԱՄՆՄԶԳ կամ ԱՄՆ կառավարության տեսակետները: