լ ր ա գ ր ո ղ ն ե ր   հ ա ն ու ն   մ ա ր դ ու   ի ր ա վ ու ն ք ն ե ր ի
ի ր ա վ ա կ ա ն    լ ր ա տ վ ա կ ա ն   կ ա յ ք
12.07.2018 | արդար դատաքննության իրավունք

Դատարանը քննության չառավ Կարո Եղնուկյանի նկատմամբ քրեական հետապնդումը դադարեցնելու մասին միջնորդությունը

Դատարանը  քննության չառավ Կարո Եղնուկյանի նկատմամբ քրեական հետապնդումը դադարեցնելու մասին միջնորդությունը
«Սասնա Ծռեր» զինված խմբին օժանդակելու մեջ մեղադրվող Կարո Եղնուկյանի գործն այս անգամ ևս չառանձնացվեց «Սասնա Ծռեր» քրեական գործից։ Դատարանը հետաձգեց պաշտպանական կողմի նույնաբովանդակ միջնորդությունը, պատճառաբանելով՝ գործով առկա ապացույցներին դեռ չեն տրվել իրավական գնահատականներ:    

Երևան քաղաքի ընդհանուր իրավասության դատարանի Ավանի նստավայրում այսօր շարունակվեց «Սասնա Ծռեր» քրեական գործի քննությունը՝ 11 ամբաստանյալներով։ Նրանց բոլորի խափանման միջոց կալանքն այս պահին փոխարինվել է գրավով, ստորագրությամբ կամ պատգամավորական անձնական երաշխավորությամբ և ազատ են արձակվել հենց դատարանի դահլիճից: Հենց այս հանգամանքով էլ պայմանավորված, այսօր դատարանի շենքի տարածքում բացակայում էին ոստիկանական ուժերը, որոնք մինչև այդ ուժեղացված հսկողություն էին իրականացնում։ 

Կես ժամ ուշացմամբ սկսված նիստի սկզբում, դատավոր Արտուշ Գաբրիելյանը հայտարարեց, որ շարունակվում է հրապարակվել գործով անցնող ապացույց հանդիսացող փաստաթղթերը, սակայն պաշտպան Տիգրան Հայրապետյանն ընդհատեց դատարանին՝ նշելով, որ միջնորդություններ ունի։ Նա միանգամից 3 միջնորդությամբ հանդես եկավ՝ դադարեցնել իր պաշտպանյալ Կարո Եղնուկյանի նկատմամբ քրեական հետապնդումը, քրեական գործից առանձնացնել Եղնուկյանին առնչվող մասը և թույլատրել նրան առաջիկայում լքել Հայաստանի Հանրապետությունը և մեկնել ԱՄՆ՝ հիվանդ մորը տեսակցելու ու իր բիզնես գործերը կարգավորելու. 

«Կարո Եղնուկյանին դեռևս հստակեցված չէ իրեն առաջադրված մեղադրանքը։ ՊՊԾ գնդի օրերին նա ընդամենը 5 հեռախոսազանգ է կատարել Վարուժան Ավետիսյանին, որոնք քրեորեն պատժելի որևէ գործողության չեն հանգեցրել, ուստի քրեական հետապնդումը դադարեցնելու իմ միջնորդությունը ենթակա է բավարարման»,- նշեց պաշտպան Հայրապետյանը: Միանգամից անցնելով հաջորդ միջնորդությանը, պաշտպանը նախ շեշտեց՝ առաջին անգամը չէ, որ այս մասին խոսում է: Ըստ փաստաբանի, Եղնուկյանի գործը դեռ վաղուց պետք է անջատվեր այս հսկայական քրեական գործից և քննվեր առանձին. « Իմ պաշտպանյալը 3-5 տարի ամեն շաբաթ ներկայանալու է դատական նիստերի, լսելու է մեղադրանքներ և ցուցմունքներ, որոնց հետ նա բացարձակապես որևէ առնչություն չունի: Եթե ավելի հեշտ և արագ տարբերակ կա, էլ ինչո՞ւ երկարացնել գործընթացը»,- պատճառաբանեց փաստաբանը: 

Տիգրան Հայրապետյանը միջնորդությունները եզրափակեց դատավորից համապատասխան թույլտվություն խնդրելով: Վերջինիս խոսքին այս անգամ միացավ նաև Կարո Եղնուկյանը: Նա դատարանին ներկայացրեց, որ ունի մեծահասակ մայր, որին չի տեսել ավելի քան 2 տարի. «Այս ընթացքում մայրս սրտի 2 լուրջ վիրահատություններ է տարել, այս պահին էլ առողջական վիճակն այնքան էլ լավ չի, իմ ներկայությունն անհրաժեշտություն է այնտեղ: Բացի դրանից, ԱՄՆ-ում ես ունեմ բիզնես, որը կարող եմ ի մի բերել և կարգավորել, միայն ես»,- դատարանին հայտարարեց Կարո Եղնուկյանը:  

Պաշտպանական կողմը միաձայն միացան միջնորդություններին, շեշտելով, որ դրանք բոլորն էլ հիմավոր են և ենթական են բավարարման: Մեղադրանքի կողմն այս անգամ խոսեց երկար, նշելով, որ 3 միջնորդություններից 2-ն արդեն իսկ մի քանի անգամ ներկայացվել են դատարանին. «Քրեական հետապնդումը դադարեցնելու և գործից մաս անջատելու միջնորդությունները դատարանը գործը քննելու սկզբից էլ հենց լսել է, սակայն դրանք բոլորն էլ մերժվել են: Նկատենք, որ այս միջնորդությունների հիմքում նոր փաստեր այսօր էլ առաջ չեն քաշվել: Ինչ վերաբերում է երկիրը լքելուն և ԱՄՆ գնալու վերաբերյալ միջնորդությանը, ապա նշենք, որ դատարան չի ներկայացվել համապատասխան փաստաթղթեր՝ Եղնուկյանի մոր առողջական վիճակի, ինչպես նաև այնտեղ գտնվող բիզնեսի մասին»,- իր խոսքում նշեց դատախազ Պետրոս Պետրոսյանը:  

Կարո Եղնուկյանին և նրա պաշտպան Տիգրան Հայրապետյանին բավականին վրդովեցրեց մեղադրող կողմի դիրքորոշումը: Նրանք միմյանց հետ բանավեճի մեջ մտան, երկուստեք իրենց խոսքը շեշտելով: Դատարանը սակցիա՝ նախազգուշացում կիրառեց ամբաստանյալ Եղնուկյանի նկատմամբ, հորդորելով հարգալից խոսել դատախազ Պետրոսյանի հետ: Լարված դրությունից քիչ հետո՝ առանց խորհրդակցական սենյակ գնալու, դատավոր Գաբրիելյանը հայտարարեց, որ որոշում է կայացրել հետաձգել քրեական հետապնդումը դադարեցնելու և քրեական գործից մաս անջատելու մասին միջնորդությունները, քանի որ գործի քննությունը գտնվում է այն փուլում, որ դեռ լիովին չեն հետազոտվել գործով անցնող ապացույցները և չեն տրվել իրավական գնահատականներ. «Այդ միջնորդությունները ոչ ժամանակին հարուցված միջնորդություններ են»,- նկատեց դատարանը: 

Անդրադառնալով վերջին միջնորդությանը, դատարանն այստեղ համակարծիք էր մեղադրանքի կողմի հետ՝ պաշտպանն ու ամբաստանյալը չէին ներկայացրել որևէ էական փաստաթուղթ կամ ապացույց, որը հնարավոր կլիներ միջնորդության հիմքում դնել. «Այդ միջնորդությունն այսօր չենք քննի: Հաջորդ դատական նիստին, եթե ներկայացնեք համապատասխան փաստաթղթեր, դատարանը գուցե վերանայի իր որոշումը»,- հայտարարեց դատավոր Գաբրիելյանը և ընդմիջում հայտարարեց:  

Ընդմիջման ընթացքում, Հովհաննես Վարդանյանի առողջական վիճակը վատացավ և նրա համար դատարան հրավիրվեց Շտապ օգնության բրիգադ: Վարդանյանի մոտ առկա է Պարբերական հիվանդությունը, ուստի նա ժամանակ առ ժամանակ, մի քանի օր շարունակ ունենում է սուր նոպաներ: Այսօր էլ Վարդանյանը դատարանին հայտնեց, որ լավ չի զգում իրեն, ցավեր ունի, ուստի դատարանը, հիմնվելով նաև Շտապ օգնության բժշկի տրամադրած հետազոտության արդյունքներին, հետաձգեց քրեական գործի քննությունը մեկ շաբաթով: 

 Ռոզա Վարդանյան              
2344
Print
արդար դատաքննության իրավունք
14 տարի է՝ չկատարած հանցանքի համար դատապարտված եմ ցմահ ազատազրկման 19.07.2018 | արդար դատաքննության իրավունք

14 տարի է՝ չկատարած հանցանքի համար դատապարտված եմ ցմահ ազատազրկման

Բաց նամակ վարչապետ Նիկոլ Փաշինյանին

«Հարգելի պարոն Փաշինյան, ես՝ ցմահ դատապարտված Արթուր Քոչարյանս, այս նամակով դիմում եմ Ձեզ՝ ներկայացնելու իմ կյանքի վերջին 14 տարիների պատմությունը, որի մասին բազմիցս բարձրաձայնել եմ, սա

Վանաձորում մեկնարկել է Ալավերդու Վահագի գործով դատաքննությունը 18.07.2018 | արդար դատաքննության իրավունք

Վանաձորում մեկնարկել է Ալավերդու Վահագի գործով դատաքննությունը

Այսօր Լուռու մարզի ընդհանուր իրավասության դատարանի Վանաձորի նստավայրում մարդաշատ էր: Ալավերդի քաղաքից հոծ բազմություն էր ժամանել՝ ոտքից գլուխ սև հագնված տղամարդիկ, դաջվածքներով երիտասարդներ: Նրանք եկել էին մասնակցելու իրենց քաղաքի հայտնի հեղինակություն Վահագն Աբգարյանի գործով դատական նիս

Մխիթար Ավետիսյանը և Էդվարդ Գրիգորյանը հերքում են Պավլիկ Մանուկյանի աղմկահարույց հայտարարությունը 18.07.2018 | արդար դատաքննության իրավունք

Մխիթար Ավետիսյանը և Էդվարդ Գրիգորյանը հերքում են Պավլիկ Մանուկյանի աղմկահարույց հայտարարությունը

«Հայտարարված ոչ մի բառ իրականությանը չի համապատասխանում: Գալիս ես դատարան, էդ մարդկանց չես էլ տեսնում, ոչ մի բառ չես փոխանակում, մեկ էլ հանկարծ սենց բան ես լսում: Մեր բոլորի համար անսպասելի էր Պավլիկի խոսքերը»,- Forrights_ի հետ զրույցում նշեցին «Սասնա Ծռեր»-ի անդամներ Մխիթար Ավետիսյանն ո

լրագրողներ հանուն մարդու իրավունքների | 530840 ; 093589631 | info@jfhr.am Մեջբերումներ անելիս հղումը «JFHR»-ին պարտադիր է:© 2013 JFHR online: Բոլոր իրավունքները պաշտպանված են:

Այս կայքը ստեղծվել է «Լրատվության այլընտրանքային ռեսուրսներ» ծրագրի շրջանակներում: Ծրագիրը հնարավոր է դարձել Ամերիկայի ժողովրդի աջակցությամբ` ԱՄՆ Միջազգային զարգացման գործակալության /ԱՄՆ ՄԶԳ/ միջոցով:Կայքի բովանդակությունը միմիայն հեղինակներինն է և պարտադիր չէ, որ արտահայտի ԱՄՆՄԶԳ կամ ԱՄՆ կառավարության տեսակետները: