10 տարի 6 ամիս անազատության մեջ գտնվող դատապարտյալ Վազգեն Կարապետյանը քիչ առաջ պայմանական վաղաժամկետ ազատ արձակվեց հենց դատարանի դահլիճից.
«Առաջինն աղջկան կողքին եմ լինելու, ինքը հիմա իմ կարիքը շատ ունի»,-ազատության մեջ հայտնվելուց րոպեներ անց Forrights-ին փոխանցեց նախկին դատապարտյալը:
Վազգենի՝ պայմանական վաղաժամկետ ազատ արձակման դիմումի համար հիմք էր հանդիսացել Պրոբացիոն ծառայության դրական բնութագիրը: Ի տարբերություն Գլխավոր դատախազության և «Վարդաշեն» ՔԿՀ—ի, Պրոբացիոն ծառայությունը նշել էր, որ դատապարտյալը պատժի կրման ընթացքում համագործակցել է իրենց հետ, դրսևորել պատշաճ վարքագիծ, մասնակցել մշակութային և ստորտային միջոցառումների, արժանացել պատվոգրերի: Բացի դրանից, նա այս պահին անհատույց աշխատում է:
«Վազգեն Կարապետյանն իր խնամքին ունի 3 երեխա, որոնցից մեկն անցած տարի առողջական լուրջ խնդիրներ է ձեռք բերել 4-րդ հարկից ցած ընկնելու հետևանքով»,- պայմանական վաղաժամկետ միջնորդության վերաբերյալ հավելում արեց Կարապետյանի պաշտպան Ռուզաննա Սիրեկանյանը:
Դատապարտյալը դատարանին տեղեկացրեց, որ իր քրեական գործով դատապարտված մյուս 3 անձիք արդեն իսկ գտնվում են պայմանական վաղաժամկետ ազատ արձության մեջ, ուստի ինքը ևս ունի այդ իրավունքը.
«Հիմա առաջնայինն աղջկաս առողջականն ա: Ազատ արձակվելուց հետո փորձելու եմ ամեն հնարավորն անեմ, որ իր կողքին լինեմ ու որևէ ձևով օգնեմ: Դրա համար էլ խնդրում եմ՝ մի՛ մերժեք միջնորդությունս ու ինձ ազատ արձակեք»,- դատարանին դիմեց Վազգենը:
Մեկ ժամ խորհրդակցական սենյակում անցկացնելուց հետո, դատավոր Պապոյանը որոշում կայացրեց բավարարել դատապարտյալի միջնորդությունը և պայմանական վաղաժամկետ ազատ արձակել հենց դատարանի դահլիճից:
Ազատության մեջ հայտնվելու լուրը Կարապետյանը մեծ ոգևորությամբ չընդունեց, ամբողջ ժամանակ պահպանում էր դեմքի մտահոգ արտահայտությունը: Միայն վերջում նա բացատրեց, որ իր անտրամադիր լինելը կապված է աղջկա առողջական վիճակի հետ:
Ռոզա Վարդանյան
Forrights.am-ը «Լրագրողներ հանուն մարդու իրավունքների» ՀԿ-ի իրավական-լրատվական կայքն է:
Մեր առաջնահերթ նպատակը մարդու իրավունքների պաշտպանությունն է հրապարակայնացման միջոցով: