Ռուբեն Մխիթարյանը ինքնաբացարկ չհայտնեց Ռոբերտ Քոչարյանի գործով. կալանավորման բողոքի քննությունը կշարունակվի վաղը

0
663

Քիչ առաջ Վերաքննիչ քրեական դատարանը մերժեց ՀՀ երկրորդ նախագահ Ռոբերտ Քոչարյանի պաշտպանների կողմից դատավոր Ռուբեն Մխիթարյանին ինքնաբացարկ հայտնելու միջնորդությունը: Մերժման հիմքերին այս պահին չեն ծանոթացել փաստաբանները:

Դատարանի այս որոշումը Հայկ Ալումյանն «անօրինական» որակեց. «Դատարանն օրենքի հիման վրա ստեղծված չէ, ըստ այդմ, դատարանի կայացրած ցանկացած որոշում, այդ թվում օրենքի սահմաններում կայացրածները, չեն կարող համարվել օրինական: Ամեն դեպքում, մենք բոյկոտել չենք կարող, քանի որ դատարանը կշարունակի քննել գործը առանց մեր ներկայության, ստիպված մասնակցելու ենք գործընթացին: Եթե դատարանն անօրինական որոշում կայացնի ոչ օրինական կազմով, մենք դիմելու ենք ՄԻԵԴ»,- հայտարարեց Ալումյանը:

Փաստաբանը չցանկացած առաջիկա գործողությունների չակերտները բացել, միայն նշեց, որ  պատրաստվում են միջնորդություն ներկայացնել Սահմանադրական դատարան դիմելու վերաբերյալ՝ ՍԴ 300-րդ հոդվածի սահմանադրականությունը վիճարկելու հարցով:

Նիստին մասնակցում էր նաև ՀՀ գլխավոր դատախազ Արթուր Դավթյանը: Նա և Ռոբերտ Քոչարյանը խուսափեցին դուրս գալ դատարանի գլխավոր մուտքից և հայտնվել լրագրողների տեսադաշտում:

ՀՀ երկրորդ նախագահի խափանման միջոցի հարցի քննությունը կշարունակվի վաղը՝ 11:00-ին:

Հիշեցնենք, որ նոյեմբերի 15-ին Վճռաբեկ դատարանը որոշում էր կայացրել բեկանել Վերաքննիչ դատարանի՝ Ռոբերտ Քոչարյանի նկատմամբ ընտրված խափանման միջոց կալանավորումն անձեռնմխելիության հիմքով վերացնելու վերաբերյալ որոշումը և գործն ուղարկել դատարան՝ նոր քննության:

Հայաստանի երկրորդ նախագահ Ռոբերտ Քոչարյանին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը։

 

ԹՈՂՆԵԼ ՊԱՏԱՍԽԱՆ

Please enter your comment!
Please enter your name here