Լրագրող Տիրայր Մուրադյանի գործով մեղադրվող ոստիկանն իրեն մեղավոր չի ճանաչում

0
276

Այսօր, Կոտայքի մարզի ընդհանուր իրավասության դատարանի Հրազդանի նստավայրում տեղի ունեցավ գործով տուժող ճանաչված, լրագրող Տիրայր Մուրդայանի գործով առաջին դատական նիստը: Հիշեցնենք, որ այս գործով մեղադրանք է առաջադրվել Ոստիկանության Կոտայքի մարզային վարչության բաժնի պետ Արսեն Արզումանյանին:

Վերջինս հանդիսանալով պետական ծառայություն իրականացնող պաշտոնատար անձ, օգտագործելով իր պաշտոնեական դիրքը, խոչընդոտել է Երևան-Սևան ավտոճանապարհի «Առինջ Մոլլ» տոնավաճառ տանող խաչմերուկում քաղաքացիների կողմից իրականացված հավաքի ընթացքը լուսաբանող «Իրազեկ քաղաքացիների միավորում» ՀԿ ներկայացուցիչ, լրագրող Տիրայր Մուրադյանի մասնագիտական օրինական գործունեությանը: ՀՔԾ-ն իր հաղորդագրությունում մանրամասնել է.

«Հասարակական կարգն ու անվտանգությունն ապահովելու նպատակով նշված վայր են ժամանել ՀՀ ոստիկանության Կոտայքի մարզային վարչության Կոտայքի բաժնի ծառայողները՝ բաժնի պետ, ոստիկանության գնդապետ Արսեն Արզումանյանի գլխավորությամբ: Լրագրող Տիրայր Մուրադյանը, զանգվածային լրատվության միջոցների մյուս ներկայացուցիչների հետ, լրագրողական վկայականով (որը տեսանելի է եղել), իր բջջային հեռախոսով ուղիղ հեռարձակմամբ լուսաբանել է քաղաքացիների և ոստիկանության ծառայողների գործողությունների ընթացքը:

Այդ ժամանակ Արսեն Արզումանյանը, օգտագործելով իր պաշտոնեական դիրքը, լրագրողի օրինական մասնագիտական գործունեությունը խոչընդոտելու դիտավորությամբ մոտեցել է Տ. Մուրադյանին և փորձել վերցնել վերջինիս բջջային հեռախոսը, այնուհետև իր աշխատակիցներին հրահանգել է Տ. Մուրադյանին հեռացնել նշված հատվածից:

Հանդիպելով Տ. Մուրադյանի արդարացի և իրավաչափ ընդվզմանը և անտեսելով լրագրող լինելու մասին վերջինիս հավաստիացումները, ինչպես նաև այն, որ լրագրողն իր մասնագիտական գործունեությունն իրականացնելիս ոստիկանների ծառայությանը խոչընդոտող վարքագիծ չի դրսևորել, այդուհանդերձ, Ա. Արզումանյանը մյուս ծառայողների հետ ֆիզիկական ուժ և բռնություն գործադրելով` Տ. Մուրադյանին նստեցրել են «Մերսեդես-Բենց» մակնիշի ավտոմեքենան և հեռացրել մասնագիտական գործունեության իրականացման վայրից»:

Նշենք, որ ՔՕ 164-րդ հոդվածի 2-րդ մասով նախատեսված արարքը պատժվում է տուգանքով՝ նվազագույն աշխատավարձի չորսհարյուրապատիկից յոթհարյուրապատիկի չափով, կամ ազատազրկմամբ՝ առավելագույնը երեք տարի ժամկետով՝ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով՝ առավելագույնը երեք տարի ժամկետով կամ առանց դրա:

Դատարանում Տիրայր Մուրադյանի շահերը պաշտպանում է փաստաբան Գրիշա Բալասանյանը, իսկ Արսեն Արզումանյանի շահերը՝ փաստաբան Լուսինե Սահակյանը: Դատավոր Հովհաննես Ավագյանի այն հարցին, թե ամբաստանյալ Արսեն Արզումանյանն իրեն մեղավոր ճանաչո՞ւմ է, վերջինս պատասխանեց, որ իրեն մեղավոր չի ճանաչում: Անցնելով ապացույցների հետազոտման կարգին՝ որոշվեց սկզբում հետազոտել գործում առկա ապացույցները: Այնուհետև դատարանում ուսումնասիրվեցին գրավոր ապացույցները, սակայն գործին կցված սկավառակը, որում առկա է միջադեպի վերաբերյալ տեսանյութը տեխնիկական պատճառներով հնարավոր չեղավ ուսումնասիրել և այդ պատճառով դատական նիստը հետաձգվեց:

Հաջորդ նիստը կկայանա այս տարվա հոկտեմբերի 1-ին:

Լիլիթ Թադևոսյան

ԹՈՂՆԵԼ ՊԱՏԱՍԽԱՆ

Please enter your comment!
Please enter your name here